[A:༤༤༣]ཞག་གསུམ་པོ་དེར་གནས་ཀྱིས་གང་ཟག་བྱིན་གྱིས་བརླབས་སོ་ཞེས་དཔག་དཀའི་ཡོན་ཏན་གཞན་རྣམས་སྦས་པར་མཆིས། ཚར་ཆེན་གྱི་གསུང་མགུར་ལས། དགྲ་གཉེན་བར་མའི་འགྲོ་བ་ཀུན། །གདོད་ནས་དག་པའི་ཧེ་རུ་ཀཿ །ལྷ་དང་ལྷ་མོའི་རྣམ་རོལ་ཏུ། །དགའ་མགུར་སྤྱོད་པ་བླ་མའི་དྲིན། །ཞེས་གསུངས་པའི་དོན་དུ་གདའ། ཆོས་སྡེར་ཕེབས་ནས་རྡོ་རྗེ་འཇིགས་བྱེད་ཆེན་པོའི་དཀྱིལ་འཁོར་གྱི་གཙོ་བོར་བཞེངས་ཏེ་རྟེན་བརྟེན་པའི་ཚོགས་དེའི་ཐད་ཀྱི་ནམ་མཁའ་གང་བར་འགྲོ་འོང་དང་ཐོ་རེངས་ཀྱི་ཆར་རང་གི་སྐུ་འཇའ་འོད་ཕུང་ངེ་བའི་དཀྱིལ་ན་ཡོད་པའི་ཐུགས་ཉམས་ཤར། ཧོར་ཟླ་བཅུ་པའི་ཚེས་བརྒྱད་ཀྱི་ཐོར་ཐུན་དངོས་གཞི་རྫོགས་ནས་པདྨ་དྲག་པོ་དབུ་དགུའི་རྣལ་འབྱོར་གྱི་ཚེ་དཀྱིལ་འཁོར་གྱི་དབུས་སུ་རྗེ་ཉིད་གཙོ་བོའི་རྣམ་པར་ཤར་བར་རེག་མཐོང་གི་མཚན་མ་བརྟན་པོ་རྙེད། ཧོར་ཟླ་བཅུ་གཅིག་པའི་ཡར་ཚེས་ལ་ཤྲཱི་དེ་བ་ཨ་ཡུའི་བསྙེན་མཚམས་མཛད་པ་གྲོལ་རྒྱུའི་ཐོ་རེངས་ཚེ་ལྷའི་སྐུའི་སྣང་བ་གསལ་ཞིང་ཚེས་བཅོ་ལྔའི་ཐོ་རེངས་སྔར་བས་ཀྱང་གསལ་བ་ཞིག་བྱུང་གསུང་བ་སྐུ་ཚེ་མཐར་ཕྱིན་པའི་རྟེན་འབྲེལ་ཁྱད་པར་ཅན་དུ་གོ །དགུང་ཀག་ཕྱིས་སྐྱེལ་གྱི་དོག་ཆར་དགོངས་ཧོར་ཟླ་བཅུ་གཉིས་པའི་ཚེས་བཞི་ནས་སྐུའི་བཅད་རྒྱ་ཚུགས་པའི་ཐོ་རེངས་སྐུར་གླགས་ལྟ་བ་འབྱུང་པོའི་ཆོ་འཕྲུལ་གྱི་འོད་ཆེན་པོ་འཁོར་ཞིང་འཁྲུག་པའི་སྟེང་དུ་རྗེ་བཙུན་པདྨ་ཐོད་འཕྲེང་མི་ཚད་ཙམ་པ་གཟི་བརྗིད་ཕུན་སུམ་ཚོགས་པ་ཞིག་བཞུགས་འདུག་པས་བ་མོ་ལ་ཉི་མ་ཤར་བ་བཞིན་དེ་འཕྲལ་དུ་ཞི། ཞག་ལྔ་ཙམ་ནས་སླར་ཡང་སློབ་དཔོན་ཆེན་པོའི་གཟིགས་སྣང་ཇེ་གསལ་ལ་སོང་བས་ཡིད་སྲུབས་ཀྱི་བར་གཅོད་ལས་རྣམ་པར་རྒྱལ། ཚེས་བཅུའི་ཉི་ཤར་གྱི་དུས་ཅུང་ཟད་མནལ་