[A:༤༤༥]དཀའ་བའི་ཐུགས་དོགས་བྱུང་བ་ན་རྩ་བརྒྱུད་ཀྱི་བླ་མའི་ཚོགས་ལ་གསོལ་འདེབས་གནང་བའི་སྒོ་ཆུང་ནག་པོ་ཞིག་ནས་བདག་ཆེན་རྡོ་རྗེ་འཆང་བླ་གོས་དང་ས་ཞུ་གསོལ་ཏེ་རྟ་ནག་པོར་ཆིབས་པ་ཕེབས་ནས་གསེར་གྱི་རྡོ་རྗེར་གཡུའི་ཕྲས་བརྒྱན་པ་མཎྜལ་གྱི་སྟེང་དུ་འཇོག་པ་གནང་བྱུང་བས་མནལ་སད་དུས་ཐུགས་དོགས་རྣམས་ལྷག་མེད་དུ་ཆོད་པ་ནི་བསམ་གྱིས་མི་ཁྱབ་པའི་གནས་ཡིན་ཅིང་ནུབ་ཅིག་ཀུན་མཁྱེན་མཁྱེན་བརྩེའི་ཞབས་ན་བཟའ་ཤིན་ཏུ་བཟང་བ་ཕྱག་སིལ་བོན་གོང་མ་དཀྲོལ་བ་གནང་བ་ན་སྒྲ་ཆེར་སྒྲོག་པ་ནི་ཟབ་ཆོས་འདི་ཉིད་ཀྱི་འཕྲིན་ལས་ཕྱོགས་བརྒྱར་ཁྱབ་པའི་བརྡར་མངོན། འཁྲིད་ཀྱི་སྔ་ཕྱི་ཚོར། ཚར་ཆེན་ཆོས་ཀྱི་རྒྱལ་པོ། རིག་འཛིན་མངའ་རིས་པ་ཆེན་པོ། །ཐམས་ཅད་མཁྱེན་པ་མཁྱེན་བརྩེའི་དབང་ཕྱུག །མཁན་ཆེན་བསླབ་གསུམ་རྒྱལ་མཚན། རིན་པོ་ཆེ་བསོད་ནམས་ཆོས་འཕེལ་དང་ལྔ་མནལ་ལམ་གྱི་ཚུལ་དུ་བྱུང་གསུང་པ་དོན་ཆོས་ཀྱི་འཁོར་ལོ་བསྐོར་བར་བླ་མ་རྣམས་དགྱེས་པའི་འཛུམ་ཞལ་ལྷུག་པར་བསྟན་ནས་ལེགས་སོའི་ཚིག་གིས་དངོས་སུ་གཟེངས་བསྟོད་པར་གོར་མ་ཆག །ཡེ་ཤེས་ཀྱི་མགོན་པོ་གཟིགས་སྣང་ལ་གསལ་བར་ཤར་བ་ནི་འབྲོག་མིར་པཎ་གྲུབ་དབང་པོ་གྷ་ཡ་དྷ་རས། ད་ཁྱོད་ལ་ཅི་དགོས་གསུངས་པ་ལ་གསུང་ངག་རིན་པོ་ཆེ་འདི་ལ་ད་དུང་གདམས་པའི་འཕྲོ་འདྲ་ཡོད་ན་གནང་བར་ཞུ་ཞུས་པས། ད་འཕྲོ་ཡེ་མེད་ཁྱོད་ལ་འདི་འདྲ་དགོས་པའི་མཚན་མིན་ཀྱང་ང་རང་གི་བྱེད་ལུགས་ཡིན་གསུངས་ནས་གུར་གྱི་ཐང་སྐུ་རྒྱབ་ལ་བཞེས། འཕྲེང་བ་མགུལ་ལ་བཅུག །གཏོར་མ་དབུ་ཐོག་ཏུ་བཟུང་ནས་གདམས་པའི་ལྷག་ལུས་རེའི་དབུ་སྙིང་གནང་བ་དང་ཆོས་ཀྱི་མཇུག་