[A:༤༤༦]ཏུ་མགོན་རྐྱང་གི་རྗེས་གནང་སོགས་མཛད་པའི་བླ་མ་ཞང་སྟོན་ཡན་ཆད་ཀྱི་སྲུང་མར་མ་ཟད་བརྩེ་ཆེན་སྙིང་པོའི་ཞབས་ནས་བཟུང་བཀའ་བབས་བཞི་ལྡན་དུ་བཞུགས་པའི་ཆོས་སྐྱོང་གི་གཙོ་བོ་ཡིན་གཤིས་བགེགས་རིགས་ཀྱི་ཚོགས་རྣམས་ཕྱེ་མར་འཐག་པའི་སླད་དུ་ཅུང་ཟད་ཙམ་ཡང་མི་འབྲལ་བར་མངོན། འཇིགས་མཛད་རྡོ་རྗེའི་རྣལ་འབྱོར་ལྷུར་བཞེས་པའི་ཤུགས་ཀྱིས་འཆི་བདག་མ་ཧེའི་ཞལ་ཅན་བཀའ་བཞིན་སྒྲུབ་པར་ཞལ་གྱིས་འཆེས་སླད་སྐུའི་སྣང་བ་མངོན་སུམ་དུ་བསྟན་པ་ནི། རྗེ་ཚར་ཆེན་གྱི་གསུང་མགུར་ལས། དཔལ་མ་ཧེའི་ཞལ་ཅན་གཤིན་རྗེའི་གཤེད། །ཆོས་སྲུང་བའི་གཙོ་བོར་གུར་ཞལ་གཉིས། །དེ་རིམ་བཞིན་བསྒྲུབས་ལ་བསྟན་པ་སྲུངས། །ཞེས་པའི་དོན་དང་མཚུངས་པར་སྣང་ཞིང༌། ཉིན་གཅིག་མནལ་རིབ་བེ་མ་ཞིག་ལ་རྗེ་ཉིད་སློབ་དཔོན་ཆེན་པོ་པདྨའི་སྐུའི་རྣམ་པར་ཉམས་ཁྱད་པར་ཅན་ཤར་བ་འདིས་མཚོན་བླ་མ་ཡི་དམ་མཁའ་འགྲོ་སྲུང་མའི་ཞལ་གཟིགས་དང་གསུང་གི་སྣང་བ་སྩལ་བ་མཐའ་ཡས་པ་ཡོད་ཚོད་དུ་མཆིས་ནའང་ཐུགས་དཀྱེལ་ཆེ་བས་བསྙེལ་བའི་བརྫུར་བརྟེན་ནོ། །ས་བྱ་ཧོར་ཟླ་གསུམ་པའི་ཚེས་བཅུ་དགུར་གཙང་ལ་ཆིབས་ཁ་བསྒྱུར་རྒྱུའི་ཐོ་རེངས་གཞན་གྱིས་བསམ་སྦྱོར་ངན་པའི་བྱད་རྦོད་ལ་བརྟེན། ཐོག་འཁྱུག་འབྱུང་བར་ཉེ་བའི་གློག་འབྲུག་སོགས་ཤིན་ཏུ་འཇིགས་པའི་སྒྲ་འོད་གསལ་དུ་བྱུང་བའི་ཚེ་རྗེ་ཉིད་བཛྲ་བྷཻ་ར་བའི་སྐུ་ཤིན་ཏུ་ཆེ་ཞིང་གཟི་བྱིན་དང་ལྡན་པ་མེ་དཔུང་འབར་བའི་དབུས་ན་བཞུགས་པའི་རྣམ་པར་གྱུར་པ་དང་ཆབས་ཅིག་པར་མི་མཐུན་པའི་ཕྱོགས་དེ་དག་འཕྲལ་དུ་ཞི་བའི་མོད་ལ་མནལ་སད་དོ། །གསང་བདག་འ་ཞའི་མཐུ་སྟོབས་ཐོར་རླུང་གིས། །ལོག་འདྲེན་སྦྱོར་བའི་ཆུ་འཛིན་ཕ་མཐར་བསྐྲད། །ཡང་