[A:༤༤༧]སྲིད་མང་པོར་འགོ་བའི་ལུས་ངན་པོ། །གཟི་བརྗིད་ཉི་མ་འབུམ་གྱི་དཔལ་རྗེས་སྙེག །ལྷུན་པོ་ཕྱེར་འཐག་མཐུ་ཆེན་དགོན་གསར་པས། །ཁྱོད་རྗེས་འཛིན་པར་བསྐུལ་ཚིག་མཆིལ་པ་ཡིས། །འབོད་གྲོགས་མགོན་པོའི་བྱིན་རླབས་ལྕགས་ཀྱི་ཕྱེ། །འདྲིན་པའི་ཁབ་ལེན་རྡོ་བར་རྐང་པ་འཇོག །ཟ་ཧོར་ས་སྤྱོད་གོས་ཀྱིས་བརྗིད་ལྡན་ཡང༌། །ངུར་སྨྲིག་དྲས་དྲུབས་ན་བཟའ་གཅིག་ཏུ་བཙུན། །རིགས་སྔགས་བརྟུལ་ཞུགས་གྲུབ་པའི་གསང་གོས་ཅན། །པད་འབྱུང་ཐོག་མའི་དགྱེས་ཞལ་ཟླ་བ་ཚེས། །ཨ་ཏི་རྫོགས་ཆེན་ཡོངས་ཀྱི་ཡང་སྙིང་བཅུད། །རྗེ་བཙུན་ཡེ་ཤེས་རྡོ་རྗེར་དགོངས་པའི་གཏེར། །གསན་ཚེ་བློ་འདས་ཆོས་སྐུའི་རང་ཞལ་ལ། །ཡེངས་པའི་ཀུན་རྫོབ་བདེན་པ་བག་ལ་ཞ། །བོད་འབངས་དགའ་སྤྲོའི་དཔལ་སྟེར་གནས་ཀྱི་རྩེ། །འཆི་མེད་བདུད་རྩེའི་བཅུད་ལེན་སྒྲུབ་པའི་ཞིང༌། །ཤེལ་དཀར་བྲག་རི་རབ་བརྩེགས་དཔའ་པོ་དང༌། །མ་ཚོགས་སྤྲིན་ལྟར་འདུ་བའི་གནས་དེར་བྱོན། །བཀའ་བརྒྱད་ཡོངས་འདུས་རིག་འཛིན་བླ་མ་ཡི། །ཐུགས་རྗེ་སྙིང་ཞུགས་རྟགས་མཚན་ཕྱི་རུ་ཤར། །གང་སྣང་ཞི་ཁྲོ་རབ་འབྱམས་རྟེན་བརྟེན་པ། །གྲུབ་པའི་གཟིགས་མོ་དེ་ལ་ཡུན་རིངས་ཡེངས། །ཁྲག་འཐུང་རྣལ་འབྱོར་མ་དཔལ་མཉམ་སྦྱོར་བའི། །དཔྱིད་ཐིག་བདེ་ཆེན་གར་གྱིས་འབྱམས་སུ་ཀླས། །མ་ཧེའི་ཞལ་དང་དབང་དྲག་དབུ་དགུ་པ། །གཏུམ་རྔམས་གད་མོས་ཀུན་བཟོད་མ་འདི་འདར། །ཐོད་ཕུའི་གྲུབ་པའི་འཁོར་སྒྱུར་སྤྲིན་འཛིན་གྱི། །ཐུགས་ལ་ཉེར་གབ་སློབ་བཤད་རྣམ་པར་རྒྱལ། །དུག་ལྔའི་ནད་བརྒྱ་འཇོམས་པའི་སྨན་གཅིག་པུས། །ཤེས་ལྡན་རྣམས་ཀྱི་ཟུག་རྔུ་མ་ལུས་ཕྱུངས། །