[A:༤༤༨]རང་བསྟན་འཆད་ཉན་ཡིད་བཞིན་རྒྱལ་མཚན་རྩེར། །བཀོད་ལ་ཡོངས་འཛིན་ཚོགས་ཀྱིས་ལེགས་སོ་བྱིན། །མིའུ་ཐུང་རྡོ་རྗེ་སྲིན་པོའི་ཞལ་སྒོ་ལས། །ལུགས་འདི་སྲིད་མཐར་མི་ནུབ་གཡར་དམ་བཅས། །རིན་ཆེན་འབྱུང་གནས་ཁྲོད་དུ་ན་ཀྲ་བཞིན། །མཁས་གྲུབ་བྱེ་བའི་བསྟི་གནས་ཞ་ལུ་ནས། །ཞིང་དཀྱིལ་ཕ་བོང་ལྟ་བུར་བསྟན་འཛིན་འགའ། །དབྱུང་བའི་ངན་སྤྱོད་དེ་ལ་མཆི་མ་བཀུ། །འཇམ་དཔལ་ཆེས་ཆེར་ཁྲོས་པས་འབྱུང་པོའི་འཚུབ། །ཐལ་བའི་རྡུལ་དུ་བརླག་ལ་ཡ་མཚན་ཅི། །ཤིན་ཏུ་ཞི་དུལ་པདྨ་ཀ་རའི་སྐུས། །བརླང་སྤྱོད་བདུད་སྡེ་མིང་གི་ལྷག་གྱུར་མཚར། །རིམ་གྱིས་རོང་བརྒྱུད་ཁུ་ལུང་དུ་ཕེབས་ནས་ཟབ་བུ་ལུང་དུ་ཐེགས་པའི་སྟ་གོན་གྱི་ཚེ་སྡེར་མ་ཙམ་གྱི་རྒྱ་ཁྱོན་གྱི་འོད་ལྔའི་གུར་ཁང་ནང་དུ་ཨྱོན་རིན་པོ་ཆེ་སྐུ་ཆུ་ཞེང་གབ་པ་ཞིག་དང་ནུབ་གསུམ་གྱི་བར་རྡོ་རྗེ་འཆང་བློ་གསལ་རྒྱ་མཚོ་ཕེབས་ཏེ་དགྱེས་པའི་ཚུལ་ཤིན་ཏུ་གསལ་བ་ཉམས་དང་མནལ་ལམ་ཅི་རིགས་པ་བྱུང༌། འོ་ཡུག་བརྒྱུད་བྱོན་པའི་དུས་ཕྱོགས་དེའི་ཡུལ་ལྷ་གཞི་བདག་གཏེར་སྲུང་སོགས་དགའ་བའི་རྣམ་འགྱུར་གྱི་བསུ་བ་ལ་འོངས་པའི་ཉམས་ལྟས་ངོ་མཚར་བའི་ངང་ནས་གནས་སུ་ཕེབས། ཐུགས་རྗེ་ཆེན་པོ་འཁོར་བ་དོང་སྤྲུགས་ཀྱི་སྐུ་འདྲ་རང་བྱོན་ལ་མཐོང་སྣང་མང་དུ་བྱུང་གསུང་པ་སྤྱན་རས་གཟིགས་མངོན་སུམ་དུ་གཟིགས་ཤིང༌། དེས་སྐུ་མདོག་རིགས་ལྔ་མཚོན་པའི་ཁ་དོག་སྣ་ཚོགས་སུ་ཤར་བ་འདྲ། ཞལ་རས་ལྷ་ཁང་དུ་བླ་མ་བཀའ་འདུས་ཀྱི་སྒྲུབ་པ་ཞག་བདུན་གནང་བའི་ནུབ་དང་པོ་ལ་པཎྜི་ཏ་དམར་སྨུག་པཎ་ཞྭ་ཅན་ཕྱག་གཡས་རྡོ་རྗེ་གཡོན་ཀ་པཱ་ལ་བདུད་རྩིས་གང་བ་བསྣམས་པ་ཞིག་བྱུང་བ་ནི་ཨྱོན་བླ་མས་བྱིན་གྱིས་བརླབས་པའི་