[A:༤༥༩]དབང་འཆི་མེད་གྲུབ་པས་ལྕགས་ཀྱི་སྲོག་བརྩའི་དངོས་གྲུབ་རྩལ་ནས་བྱིན་གྱིས་བརླབས་པར་གདོན་མི་ཟ། ཆོས་སྡེའི་མགོན་ཁང་གི་གཏོར་འཁྲིས་ན་གནོད་སྦྱིན་ཆེན་པོ་བེག་ཙེ་ཕོ་རྐྱང་གི་རྣམ་པར་མདའ་གང་ཙམ་པའི་སྐུ་ཚད་གཏུམ་རྔམ་བརྗིད་བག་དང་ལྡན་པ་ཤིན་ཏུ་གསལ་བ་གཟིགས་པ་ནི་ས་ལུགས་བྱིངས་ལ་ཆོས་སྐྱོང་འདི་ཉིད་གྲགས་ཆུང་ཡང་བླ་མ་གཉན་ལོ་ཙཱ་བ་ཐུགས་གཙིགས་ཆེ་ཞིང་མགོན་པོ་ཞལ་གྱི་ལས་མཁན་དམར་ནག་གཉིས་ཀྱི་དམར་པོ་ཡིན་པས་རྡོ་རྗེ་འཆང་ཚར་པ་ཆོས་རྗེ་ནས་བཟུང་ལུགས་འདིའི་ཆོས་སྲུང་གི་གཙོ་བོ་ཞིག་ཏུ་མཛད་གཤིས་དཔོན་སློབ་སྡེ་དང་བཅས་པ་མཐའ་དག་གཡེལ་མེད་དུ་བསྲུང་བར་དམར་ཟླུམ་གྱི་སྤྱན་ཉི་ཟླ་ལྟར་འཁྱིལ་བའི་བརྡར་མངོན། ལོ་སྔུན་མའི་བདེ་གཟར་རྒྱུན་རིངས་པར་བརྟེན་བསྒྲིགས་ཀུན་སྤྱོད་རྣམས་བག་ཡངས་པ་གྲྭ་པ་ཁ་ཤས་འཆལ་པའི་སྐྱོན་བྱུང་བ་བསླབ་པ་བསྐྱར་ཞིང་དགེ་འདུན་གྱི་ཁྲིམས་སུ་བཅའ་བ་ལེགས་པར་བསྡམས་པའི་ནུབ་མནལ་ལམ་དུ་ནང་མདོ་སྦུག་བྱས་པའི་སྤྲོ་ས་དེར་ཚར་ཆེན་ཆོས་ཀྱི་རྒྱལ་པོ་བཞུགས་པའི་སྐུ་མདུན་དུ་ཤིང་གཞོང་ཆེན་པོ་རྩམ་པའི་ཕུང་པོས་གང་བ་ཞིག་བཞག་འདུག་པའི་དྲུང་དུ་བྱོན་པ་ན་རྡོ་རིང་རིན་པོ་ཆེའི་དོན་ཡིན་ནམ་གསུང་བ་མནལ་སད་ནས་ཐུགས་བསམ་གནང་ཚེ་བདག་འདི་ཕྱོགས་སུ་སྡོད་འདོད་མེད་ཀྱང་ཆོས་སྡེ་འདིའི་འཛིན་སྐྱོང་སྤེལ་གསུམ་གང་ནུས་སུ་བགྱིས་པ་དང་ཉེ་ལམ་དགེ་འདུན་རྣམས་ཁྲིམས་ལ་བཀོད་པ་སོགས་དོན་དུ་གཉེར་བ་འདི་བླ་མ་ཡབ་སྲས་ཀྱི་བསྟན་པ་ཁའུ་པའི་རིང་ལུགས་སུ་གྲགས་པ་འདི་ལ་བསམས་པ་ཡིན་པས་གསུང་དེའང་དོན་དེའི་ཐོག་ཏུ་འབེབས་པར་འདུག་སྙམ་པ་དགའ་སྤྲོ་དང་མོས་གུས་ཚད་