[A:༤༦༠]མེད་པ་བྱུང་ཚུལ་མཆིས། དབུས་གཙང་ས་ཁད་འགྱངས་པ་དང་སྐུ་ན་སྨིན་པ་ནས་ཕེབས་འགྲུལ་རྟག་པོ་མ་ཐུབ་པར་བརྟེན་དམར་སེར་ཞེས་པ་མེ་སྦྲུལ་ཧོར་ཟླ་གཉིས་པའི་ཚེས་བཅོ་ལྔ་གཟའ་སྐར་འཕྲོད་སྦྱོར་དགེ་བའི་དུས་དགའ་ལྡན་ཡིད་དགའ་ཆོས་འཛིན་དུ་དམ་པ་ཏོག་དཀར་པོས་རང་གི་ཅོད་པན་མ་ཕམ་པའི་དབུར་བཅིངས་ཏེ་རྒྱལ་ཚབ་ཏུ་བསྐོས་པ་ལྟར་ཆོས་དང་རིགས་ཀྱི་རྒྱལ་བའི་སྲས་དབོན་རིན་པོ་ཆེ་མགོན་པོ་བསོད་ནམས་མཆོག་ལྡན་རྗེ་རྡོ་རྗེ་འཆང་རང་གི་ཆོས་ཀྱི་ཁྲིར་མངའ་གསོལ་ནས་ཡོན་མཆོད་སྐྱ་སེར་མཐའ་དག་གིས་ལེགས་འབུལ་དང་བཅས་ཕུན་སུམ་ཚོགས་པའི་དགའ་སྟོན་རྒྱ་ཆེར་མཛད་དེ་རྗེ་བླ་མ་གཙང་ཕྱོགས་སུ་ཆིབས་ཁ་བསྒྱུར་བའི་རི་ཕུག་ཏུ་ཕེབས། དབྱར་ཁྱབ་བདག་ཞ་ལུ་པ་ཆེན་པོའི་ཐོག་དྲངས་པའི་ཁ་ཤས་ལ་བདེ་ཆེན་རལ་གཅིག་གི་རྫོགས་རིམ་སེམས་ཉིད་ངལ་གསོའི་འཁྲིད་སོགས་ཆོས་བཀའ་ཁ་ཡར། དེ་རྗེས་གླང་ཕུ་ཆོས་རྗེ་འཇམ་དབྱངས་ཆོས་སྐྱོང་དབང་ཕྱུག་གིས་གསོལ་བ་བཏབ་པ་ལ་བརྟེན་ནས་ཞ་ལུ་པ་ཆེན་པོ་སོགས་ཆབས་ཅིག་པར་གུར་གྱི་སྲུང་འཁོར་བྲག་རྫོང་མ་ཕྱི་ནང་གསང་གསུམ་གྱི་འཁྲིད། རྣམ་སྲས་ཀྱི་རྗེས་གནང་སྐོར། །ལུང་ཁ་ཤས་གནང༌། དེ་མུས་ངོར་ནས་མཁན་ཆེན་སྒྲུབ་ཁང་པ་མཁས་གྲུབ་དཔལ་ལྡན་དོན་གྲུབ་ཕེབས་པར་གདུགས་དཀར་ཞེ་གཉིས་མའི་དབང༌། གུར་མགོན་གསང་འཁྲིད་སོགས་སྩལ། སྟོན་སྡེ་པ་གླང་ཕུ་ནས་ཀྱིས་གཞིས་ཀར་སྤྱན་དྲངས་ཏེ་བྱང་གཏེར་ཐུགས་རྗེ་ཆེན་པོ་འགྲོ་བ་ཀུན་སྒྲོལ་གྱི་སྒོ་ནས་མདང་སྟོན་ཆོས་སྐྱོང་བསོད་ནམས་ཀྱི་ཕྱག་བཞེས་བཞིན་སྐྱེ་བདུན་རིལ་བུའི་སྒྲུབ་པ་མཛད་པས་དྲིལ་བུ་དགུ་ཙམ་འཕེལ། ཞལ་ངོ་ཚོར་བྲག་རྫོང་