[A:༤༦༥]མྱུར་དུ་བླ་ན་མེད་པའི་བྱང་ཆུབ་ཐོབ་པའི་མྱོང་གྲོལ་སྐྱེ་བ་བདུན་པའི་དམ་རྫས་ཀྱིས་འགྲོ་བ་མཐའ་དག་གི་དོན་རྒྱ་ཆེར་མཛད་ཅིང་ཡང་འུག་གཉིས་ཀྱིས་གཙོས་པའི་གཞིས་རྩེ་སྐོར་གྱི་སྔགས་པ། སྒྱི་ལུང་ཡབ་སྲས་ཀྱིས་དབུས་པའི་ཞ་ལུ་ཚོང་འདུས་ཀྱི་སྔགས་པ། རྗེ་དབོན་བཀའ་འགྱུར་བ་དང་ཁྱབ་བདག་ཞ་ལུ་པ་སོགས་དོན་གཉེར་ཅན་མང་པོར་བཀའ་བརྒྱད་བདེ་འདུས་ཀྱི་སྒྲུབ་དབང་གནང༌། ངོར་དུ་ཚིགས་ཕྱི་མ་གསན་ཏེ། ཞ་ལུར་དྲུང་དུ་ཕེབས་རྡོ་རྗེ་འཆང་སྡེ་པ་ཁྲི་ཁང་པའི་དབོན་ས་གདོན་དྲག་ཤུལ་ཅན་གྱིས་གཙེས་ཏེ་མི་འཚོ་བར་ཐུག་པ་སྨན་པ་དང་སྔགས་པ་ནུས་པ་ཅན་གྱིས་བོར་ཞིང༌། སྨན་པས་ད་དུང་བླ་མ་བྱིན་རླབས་ཅན་འདྲ་གདན་འདྲེན་ཐུབ་ན་བདེ་བའང་སྲིད། ཅེས་གླེང་བ་ལྟར་རྗེ་འདི་ཉིད་སྤྱན་དྲངས། རྟ་མགྲིན་སྐྱེར་སྒང་ལུགས་ཀྱི་བྱིན་རླབས་གནང་བའི་མོད་ལ་ནད་ལས་གྲོལ་བས་ཕྱོགས་ལྷུང་དྲག་པོའི་གདོན་གྱིས་ཟིན་པ་རྣམས་ཀྱང་ཡ་མཚན་དུ་འཛིན་ཏོ། རིན་ལྡིང་གི་སློབ་དཔོན་དུ་མཁན་ཆེན་ཞ་ལུ་པ་འབྱོན་གདོང་གདན་བཟོས་གནང་བྱིན་བཀྲ་ཤིས་ཕྱག་ནས་རྒྱས་པར་གནང་བའི་གཤམ་དུ། བལྟས་པ་ཙམ་གྱིས་ཁམས་གསུམ་དབང་དུ་སྡུད། །ཅེས་སོགས་གསུངས་ནས་མཇུག་ཏུ་རྙིང་མ་ཞིག་བྱུང་སོང་ངོ་ཨང་གསུང༌། རིན་ལྡིང་ནས་རྗེ་ཞ་ལུ་པས་མཇལ་བར་ཕེབས་པར་རིག་འཛིན་ཆེན་པོའི་བཀའ་འདུས་དང་དྲག་པོ་དབུ་དགུའི་དབང་གནང༌། ངོར་ནས་རིན་པོ་ཆེ་སྒྲུབ་ཁང་ནས་མཇལ་བར་ཕེབས་ཏེ་བཀའ་ཆོས་དང་གསུང་གླེང་འཕེལ་བར་བྱུང༌། ཕ་རྒོད་རྡོ་རྗེ་འཆང་དགོན་གསར་པའི་དགོངས་བསྟད་ཀྱི་ཕེབས་སྒོ་ལྟར་གཙང་སྡེ་སྲིད་ཀྱི་བཀའ་ཤོག །སྡེ་པ་འདར་