[A:༤༦༩]མཐའ། འདའ་ཁ་མ། སྒྱུ་ལུས། འོད་གསལ། རྨི་ལམ་དང་བཅས་པའི་ཉམས་འཁྲིད་དབང་བྱིན་རླབས་སོགས་ཆ་ཚང་བར་ཁྱོན་བསྡོམས་ཟླ་བ་ཕྱེད་བརྒྱད་ལ་སྨིན་རྒྱས་སུ་གནང་བ་ནི་ཚར་ཆེན་གྱི་གསུང་མགུར་དུ། ཉམས་ལེན་གདམས་པའི་གཙོ་བོ་ནི། །རྒྱལ་ཡུམ་བདག་མེད་མཁའ་འགྲོ་ལ། །པཎ་གྲུབ་དབང་པོ་བི་རཱུ་པས། །ནོས་པ་ནས་བཟུང་ད་ལྟའི་བར། །རྩ་བའི་བླ་མ་ཡན་ཆོད་དུ། །དབང་བཞིའི་ཆུ་བོ་མ་ནུབ་པའི། །བླ་མའི་གསུང་ངག་བདུད་རྩིའི་རྒྱུན། །ཚད་མ་བཞི་ལྡན་དབང་བཞིའི་ལམ། །རྡོ་རྗེ་ཐེག་པའི་སྙིང་པོ་ཡིན། །ཞེས་གསང་སྔགས་ཀྱི་ཡང་སྙིང་ཚད་མ་བཞི་ལྡན་གྱི་སྙན་བརྒྱུད་ལེགས་པར་གདམས། རིན་ལྡིང་ནས་ཞ་ལུ་པ་ཆེན་པོ་རིན་ཅེན་བསོད་ནམས་མཆོག་གྲུབ་ཀྱིས་རྡོ་རྗེ་འཆང་ལ་ཞུ་ཡིག་ཏུ་ལོ་འདི་བཞུགས་ཀྱི་བཀའ་བཞེས་བློ་བདེ་བ་ཞིག་དགོས་ཞུ་བ་གནང་བའི་ཚེ་སྤྱིར་བསྟན་པ་དང་སྒོས་ཁྱེད་རང་ལ་བསམས་ལོ་ལྔ་སྡོད་པའི་མཉམ་གཞག་བརྟན་པོ་བྱེད་ཅེས་པའི་ཞུ་ལན་སྩལ་ལོ། །ལེགས་འདོད་གཡོ་སྒྱུས་ལོག་པའི་ལམ་འཁྲིད་མགྲིན། །ལེགས་ལྡན་གྲི་གུག་འབར་བས་ཉེར་གཏུབས་ཀྱང༌། །ལེགས་ཚོགས་ཀུན་འབྱུང་རྡོ་རྗེ་འཛིན་ཁྱོད་ཀྱིས། །ལེགས་པའི་མདུན་རྩེ་བདེ་ཆེན་གནས་སུ་བསྐྱལ། །པད་འབྱུང་ཁྲོས་པའི་མཐར་ཐུག་དབུ་དགུ་པ། །པད་འབྱུང་བསྟན་པའི་ཉིན་བྱེད་བྱང་པ་རྗེས། །པད་འབྱུང་ཟབ་གཏེར་བདག་པོ་ཁྱོད་ཉིད་ཀྱིས། །པད་འབྱུང་དགོངས་པ་སྐོང་སླད་ཆེད་དུ་གདམས། །རྩ་གསུམ་འཁོར་ལོའི་སྣང་བ་ཟད་མི་ཤེས། །གཅིག་ལས་དུ་མར་བསྒྱུར་བའི་སྣ་ཚོགས་འཕྲུལ། །ཚུར་མཐོང་བྱིས་བློ་བྲིད་མོད་ངེས་དོན་དུ། །ཆུ་དང་རླབས་འཕྲེང་དབྱེ་བ་གང་གིས་