[A:༤༧༠]འབྱེད། །གར་དབང་འཆི་མེད་གྲུབ་པས་ལྕགས་སྲོག་རྩ། །བདུད་རྩིའི་འོད་འཕྲོ་ཚངས་བུག་ནས་བཅུག་ཚེ། །ལྔ་པའི་ཞགས་པ་འཕེན་པའི་དཀའ་ཐུབ་ཅན། །ཉི་མའི་བུ་དེ་ངལ་བའི་གཉིད་ལ་གཡུར། །གཉེན་པོའི་རླབས་ཀྱིས་མ་ཟིན་ཐ་རེངས་རྒྱུད། །ཚུལ་ལྡན་མྱུ་གུ་སྐེམས་པར་མངོན་ཕྱོགས་པ། །རྣམ་དག་སྡོམ་པའི་ཆར་གྱིས་གཏན་བདེའི་སྙེ། །སྨིན་དེ་ཐུགས་རྗེའི་མཁའ་གླང་སྟུག་པོའི་དྲིན། །གསུང་རྒྱུན་འཛིན་པའི་སྟོང་ཕྲག་སྲས་མངའ་ཡང༌། །རིགས་ཀྱི་ཐུ་བོ་མཚུངས་མེད་བཀའ་འགྱུར་པ། །སློབ་བཤད་མང་བཀུར་ཁྲི་ལ་རབ་བཀོད་པས། །ཆོས་ཀྱི་འཁོར་ལོས་སྒྱུར་བའི་རེས་སུ་སོན། །རྒྱུད་སྡེའི་མངའ་བདག་དཔལ་ལྡན་དོན་གྲུབ་ཐུགས། །རྣམ་དཔྱོད་ལུས་ཕྲའི་མིག་དཀྱུས་རིང་པོས་ཕྲོགས། །མཁན་ཆེན་ཞ་ལུ་པ་དང་གླང་ཕུ་རྗེ། །རང་བསྟན་གདམས་པའི་བང་མཛོད་ལྡེ་མིག་གཏད། །རྒྱ་ཆེན་གཙུག་ལག་ཀུན་ལ་གཞན་གྱི་དྲིང༌། །མ་ལྟོས་དབྱོད་ལྡན་ངག་དབང་ཆོས་ཀྱི་གྲགས། །ཁྲོ་ཕུ་ལོ་ཙཱར་མཁྱེན་ནས་ལེགས་བསྔགས་པ། །འདམ་ཁྲོད་ཡིད་བཞིན་ནོར་བུའི་བྱི་དོར་འདྲ། །ཤེས་བྱར་སྲིད་ཀུན་ཡོངས་མཁྱེན་བུ་སྟོན་རྗེའི། །རི་ཕུག་ཆོས་ཀྱི་ཕོ་བྲང་ཉམས་དགའ་བར། །བསྟན་པའི་མེ་རོ་སླར་ཡང་གཉིས་པ་ཞིག །གསོ་བའི་ལེགས་ལྡན་དཔྱིད་དུས་བཞིན་རས་དངོམ། །བདེ་གཤེགས་ཞི་ཁྲོ་འདུས་པའི་དཀྱིལ་འཁོར་ཆེར། །ཟུར་སྟོན་འུག་བྱ་ལུང་སོགས་རིག་སྔགས་འཆང༌། །མཐའ་ཀླས་སྨིན་པ་དཔལ་གྱི་མཆིམས་ཕུ་རུ། །རྗེ་འབངས་ཉེར་ལྔའི་མཛད་པར་ཅོ་འདྲི་སྙམ། །ཚར་ཆེན་བླ་མའི་གདན་ས་ས་སྲུངས་སྟེང༌། །རྣམ་དཔྱོད་སྤྱན་སྟོང་མངའ་བ་རབ་འགྱིང་ཚེ། །ལོག་རྟོག་ལྷ་མིན་མོ་ཡི་