[A:༤༧༡]མངལ་ལྷུངས་དང༌། །ལྷན་ཅིག་སློབ་བཤད་བཅུད་ཀྱི་དགའ་སྟོན་རྒྱས། །རང་རང་ལས་འཆིར་རློམས་པའི་གྲོ་སོགས་མདས། །སྲོག་རྩ་འགགས་ནུས་མིན་ཀྱང་སྟེས་དབང་གིས། །མིག་འབྲས་བཅར་བ་སྐྱོབ་ཕྱིར་དགོན་གསར་པས། །གཞོམ་མེད་འཁོར་ལོར་ཆུག་ཅེས་ཆེད་དུ་གདམས། །མཐོ་རིས་དབང་ཆུ་སློབ་བཤད་རལ་ཀླུང་ནས། །རྣམ་དཔྱོད་སྐལ་ལྡན་ཤིང་རྟས་ཉེར་དྲངས་ཀྱང༌། །མཁས་གྲུབ་དྲང་སྲོང་ཕལ་གྱི་ཕྱིར་སྐྱུགས་པ། །ཤོང་སྣོད་ཟླ་བའི་མ་མ་གསར་པ་མཚར། །རྒྱལ་ཚབ་དབོན་རིན་པོ་ཆེར་མྱུག་ནས་འཕོ་འཕྱུགས་སྐབས་རྩེ་གདོང་དུ་བཅོལ། དེ་ནས་རི་ཕུག་ཏུ་དྲངས་སླར་འདར་དུ་གདན་དྲངས་པའི་ལམ་འབྲས་བརྒྱུད་པའི་ཁ་སྐོང༌། ཁའུ་བྲག་རྫོང་པའི་བརྒྱུད་པ་ན་རིམ་གྱི་སྐུ་ཐང་སོགས་བཞེངས་ནས་ལམ་འབྲས་ལྷ་ཁང་བསྒྲིག་པའི་བསླབ་སྟོན་སྩལ་བ་ལྟར་ལེགས་པར་གྲུབ་པ་དེས་ལྕགས་ཡོས་མེ་ཤོར་བྱུང་སྐབས་ཀྱང་མ་ཚིག་པའི་བྱིན་རླབས་ཅན་དུ་གྲགས། གཞན་ཡང་སྔ་ཕྱི་འདི་དག་ཏུ་རྗེ་འདི་ཉིད་དང་གླང་ཕུ་ཆོས་རྗེར་ཟབ་ཆོས་མང་དུ་གནང་བ་ནི་ཚར་ཆེན་གྱི་གསུང་མགུར་དུ། ད་ཀུན་སྤངས་ཆོས་རྗེའི་བུ་བརྒྱུད་ལ། །ཆོས་ཟབ་མོ་གདམས་པའི་སྙན་གྲགས་ཡོད། །དེ་ཐོབ་འདོད་ཀྱི་ཚབ་ཚུབ་མང་ན་ཡང༌། །ཐོབ་ངེས་ཀྱི་སྣོད་ལྡན་རེ་རེ་ཙམ། །ཞེས་པ་ལྟར་རྗེས་འབྲངས་ཀྱི་སློབ་མ་གྲངས་མང་ནའང་གདམས་པ་ཡོངས་སུ་རྫོགས་པ་ཉུང་བར་མཆིས། ས་སྐྱའི་རྗེ་བཙུན་གོང་མ་རྣམས་ཀྱི་སྙན་ནས་སྙན་ཞལ་ནས་ཞལ་དུ་བརྒྱུད་པའི་ཟབ་ཆོས་དོ་བ་སྟོན་ཚུལ། རྒྱལ་ཚ་ལུང་མང་པོ་དབོན་བཅས། དམ་པ་ཀུན་དགའ་གྲགས། ཞང་སྟོན་ཁུ་དབོན་ཙམ་མ་