[A:༤༨༤]པོད་ལོངས་ཤིག་སྣང་བ་དོན་མེད་ཀྱི་བསྐྱར་བཤད་ཙམ་མིན་པའི་བརྗོད་དོན་ཕུན་སུམ་ཚོགས་པ་ཤ་སྟག་མཆིས། བརྩེ་བའི་ཆ་ནས་སྐུ་ཚེ་མང་པོར་མཁས་པ་དང་གྲུབ་པའི་ཡང་སྲིད་བཟུང་བའི་རྒྱལ་སྲས་ཀྱི་སྤྱོད་པ་ལ་གོམས་པའི་བག་ཆགས་ཀྱིས་རྒྱུ་འབྲས་མན་ངག་བདུན་གྱི་སྒོ་ནས་བདག་གཞན་མཉམ་པར་བརྗེ་བའི་ཐུགས་བསྐྱེད་བཅོས་མ་མིན་པ་འཁྲུངས་པའི་རྒྱུས་ཆགས་སྡང་གི་སྒང་གཤོང་མེད་པའི་བཏང་སྙོམས་ཀྱི་ཐང་བདེ་མོར་རིས་མེད་ཀྱི་འགྲོ་བ་ཐམས་ཅད་ལ་དངོས་དང་བརྒྱུད་པའི་སྒོ་ནས་རྗེས་སུ་བཟུང་བ་མཐའ་དག་འདྲི་བར་མ་ལང་ཞིང་དཔེར་ན་ཤིང་བཟོ་བ་དཔལ་ལྡན་སོགས་འཆི་བར་ཐུག་པ་མང་དག་ལ་མི་འཇིགས་པའི་སྦྱིན་པ་དང༌། གཤིན་པོ་སོགས་ལ་ལྷག་པར་བརྩེ་བས་རིགས་དྲུག་གནས་འདྲེན་གྱི་སྒོ་ནས་གནས་ངན་ལེན་ལས་བསྐྱབས་པའི་སྡིག་ཅན་འགའ་ཡང་མི་ལུས་ཐོབ་ནས་སྐྱེ་དྲན་གསལ་བའི་ལོ་རྒྱུས་མང༌། དབུལ་ཕོངས་མ་ནུས་པ་གཟིགས་པའི་ཚེ་བཟོད་གླགས་མེད་པའི་སྐྱོ་ཤས་དང་ངེས་འབྱུང་གིས་ཟིན་པའི་ཟས་གོས་གནས་མལ་སྨན་གྱིས་མཚོན་ཏེ་ཕན་འདོགས་པ་ལ་བརྩོན་པས་གཞན་དོན་དུ་གང་འགྱུར་མ་གཏོགས་རང་གི་བདོག་པ་ལ་འཇུངས་པའི་རྟོག་པ་ཡེ་མི་མངའ། གཙོ་བོར་མཆོག་དམན་བར་པ་གསུམ་སོ་སོའི་བློ་དང་འཚམ་པའི་ཆོས་ཀྱི་སྦྱིན་པ་བསྟན་པ་དང་སེམས་ཅན་ལ་ཕན་པ། ཐོས་བསམ་བསྒོམ་པ། ཉམས་ལེན་བྱེད་ལུགས་ཕྲ་མོ་ཙམ་ལའང་རས་ཆོད་དུ་མ་སོང་བའི་སྐྱོ་ངལ་མེད་པར་བསླབ་བྱའི་སྒོ་ནས་མངོན་མཐོ་དང་ངེས་ལེགས་ཀྱི་སར་སྦྱོར་ནུས་པའི་ཆ་ནས་གྲུབ་པའི་དབང་ཕྱུག་ཀུ་ཀུ་རི་པ་སོགས་