[A:༤༨༥]གཟོད་མ་ཉིད་ནས་བསྐྱེད་རིམ་མཐར་ཕྱིན་ཅིང་རྫོགས་རིམ་གྱི་རྟོགས་པ་ཀློང་དུ་གྱུར་པས་གྲུབ་པ་བརྒྱད་དང་ཞི་སོགས་ཀྱི་ལས་རབ་འབྱམས་ལ་ཆགས་ཐོགས་མི་མངའ་ཡང་ཐུབ་བསྟན་འཇིག་པ་ལ་ཉེ་བ་ལྟ་བུ་བྱུང་ན་མིན་པ་སྐུ་ལ་སྔོ་བ་སོགས་ཐུགས་སུན་འབྱུང་བའི་མ་རུངས་སྐྱེ་བོ་དུ་མར་དྲག་ཤུལ་གྱི་ཆོ་ག་མཛད་པ་ལྟ་ཅི། དེ་དག་མི་དགེ་བའི་མཐུས་ངན་འགྲོ་མི་བཟད་པའི་དུཿཁས་མནར་བ་ལ་བརྩེ་བས་ཀུན་ནས་བླངས་ཏེ་ཐུགས་རྗེ་རྗེས་བཟུང་གི་ཏིང་ངེ་འཛིན་ལ་གཞོལ། བཀའ་ཆོས་གནང་ཚེ་གསུང་གདངས་སྙན་ཆགས་པ་ཐོས་པའི་མོད་ལ་སེམས་ཁོངས་རང་བཞིན་གྱིས་ལྷོད་འགྲོ། ཕྱི་རོལ་ཏུ་ཉོན་མོངས་པ་མེ་ལྟར་འབར་བས་གདུང་བཞིན་པ་བློ་བྲེལ་ཚུབ་ཚུབ་པ་དྲུང་དུ་སླེབས་པ་དང་ད་རེས་ཀྱི་སེམས་གནས་འགྱུར། ཇི་ཙམ་བསྡད་ཀྱང་སྡོད་སྤྲོ་བ་དང་སྐུའི་ཚུལ་ཁྲིམས་ཀྱི་དྲི་བསུང་ཚོར་བས་ཁམས་གསལ་སེང་ངེར་དངས། ཐུགས་དམ་མཛད་སར་བསྡད་ན་བྱིན་རླབས་ཀྱིས་རང་གི་དགེ་སྦྱོར་ཀྱང་གནས་གཞན་དུ་བྱས་པ་དང་ཡེ་མི་འདྲ་བ་ཡོང༌། དབང་རྗེས་གནང་གི་དུས་ཟིལ་ཆེ་བས་ད་ལྟ་རང་བྱིན་རླབས་ཁྱད་པར་ཅན་ཞུགས་བྱུང་སྙམ་པ་འབྱུང་བས་མཚོན་ཏེ་གསང་བ་བསམ་གྱིས་མི་ཁྱབ་པའི་རྣམ་ཐར་དཔོག་པར་མི་ནུས་པ་བློ་དམན་རྣམས་ཀྱི་ཡུལ་མ་ཡིན་ནོ། །འཁོན་རིགས་འཇམ་དཔལ་དཔའ་བོ་རིམ་བྱོན་གྱིས། །ཆིག་བརྒྱུད་རིན་ཅེན་རྩིང་སྤྱོད་འདམ་བྱིང་ལས། །རྣམ་དཔྱོད་ཤིང་རྟས་འདྲེན་པའི་ས་སྐྱ་པ། །དབྱི་མོང་ཤུལ་དུ་སྐྱེས་པའི་ཙན་དན་བཞིན། །ཕ་བཟང་གོང་མའི་ཕྱག་བརྒྱུད་ཁྱད་པར་ནོར། །ཕ་རོལ་