[A:408]bstan te bslus brgyab pa'i rdzong sde pa gtsang par sprad cing dam pa 'di nyid kong dmag la btad de sa dong du bzhugs bcug dong gi kha bir phub kyis bcad khyi thu bo btags nas nye skor du 'grul mi yong pa'i ngam dog chen pos shin tu 'o brgyal skabs spros med la brten pa'i thugs dam rnams ma chag cing / gsol ba'i phud mchod la brten nas chos skyong rnams kyi gtor bsngo ma gtogs gzhan ma'i spros pa che ba rnams gnang ma thub/ de yang mau gal gyi bu'i phyag zhabs thams cad kun tu rgyus 'dam bu ltar bcoms pa'i lo rgyus bzhin yul khyad par can rnams la'ang kun rdzob tu las kyi 'bras bu mi yong ba'i mtha' ma bkag cing/ de bzhin gshegs pa ye shes shAkya'i mdo las/ des bskal pa grangs med par gang sdig pa'i las mngon par 'dus byas par gyur pa de dag gis/ de yang phyi ma'i dus na klad pa na ba tsam gyis thams cad 'byang bar 'gyur/ sems nyam nga ba tsam gyis thams cad 'byang bar 'gyur/ skur pa btab pa tsam gyis thams cad 'byang bar 'gyur/ brnyas pa tsam gyis thams cad 'byang bar 'gyur/ 'thing slad byas pa tsam gyis thams cad 'byang bar 'gyur/ co dris pa tsam gyis thams cad 'byang bar 'gyur/ rnyed pa chung bas thams cad 'byang bar 'gyur/ skye ba gcig kho nas thams cad 'byang bar 'gyur/ zhes pa ltar sbyang bya'i sdig ltung chen po'i tshogs kyang tshegs chung ngus gzhil bar gyur pa ltas ngan g.yang du lon pa yin pas rang rgyud pa'i ngang tshul du mi sems so/ /mi ring bar gzhis nas gser gyis gtsos dngos po gtos che ba'i blus mas