གཏེར་སྟོན་འཇམ་དཔལ་རྡོ་རྗེའི་ཚེ་སྒྲུབ་ཐུགས་ཀྱི་ཡང་སྙིང་གི་ཆོས་སྐོར། སྣང་རྩེ་པའི་ཚེ་འཁྲིད་ཡང་སྙིང་འདུས་པ། འཇམ་དཔལ་ནག་པོའི་ཡིག་སྣ་གཉིས། གཏེར་སྟོན་ཤེས་རབ་འོད་ཟེར་གྱི་འཆི་མེད་སྐུ་གསུམ་འདུས་པ། སྤོ་བོ་གཏེར་སྟོན་པདྨ་རིག་འཛིན་རྩལ་གྱི་ནོར་བུ་པདྨའི་འཕྲེང་བའི་གསང་སྒྲུབ་ཀྱི་སྐོར། ཟླ་བན་གཟི་བརྗིད་འབར་གྱི་སྔགས་སྡེབས་སྙིང་གི་མེ་ལོང་ཟུང་གི་ལུང༌། རྒྱ་བན་རྡོ་རྗེ་དབང་ཕྱུག་གི་བཅུད་ལེན་གྱི་གདམས་སྐོར། སྤྲུལ་སྐུ་དམ་པ་དམར་པོའི་བདུད་རྩི་བུམ་པའི་བཅུད་ལེན་སྐོར། བལ་པོ་བཛྲ་མ་ཏིའི་རིམས་སྲུང༌། གུ་རུ་ཁྱུང་ནག་གི་གཤིན་རྗེའི་སྐུ་གསུང་ཐུགས་ཀྱི་ཟ་ཡིག །གཏེར་སྟོན་བོན་པོ་དྲག་རྩལ་གྱི་རཱ་ཧུ་ལ་ཤིས་བསྟན་པ་དང་རུས་སྦལ་སེར་སྲུང༌། ལྕང་སྨན་དོན་གྲུབ་དར་གྱི་དུག་སྨན་གྱི་གདམས་པ། གཡུ་ཐོག་སྙིང་ཐིག་གི་སྨན་ལྷ་མཆེད་གསུམ་ཡེ་ཤེས་ཁྱེའུ་དང་བཅས་པའི་རྗེས་གནང༌། དེ་བཞིན་དུ་གསུང་སྤྲུལ་ཚུལ་ཁྲིམས་རྡོ་རྗེ་ལ་བླ་མ་སྙིང་ཏིག་གི་དབང་ལུང་སོགས་གསན་ཞིང་ཁོང་དཔོན་སློབ་གཉིས་ལ་ཕར་ཡང་བཀའ་ཆོས་ཅི་རིགས་སྩལ་ཆར་འབེབས་ལ་ཟུར་ཀུན་མཁྱེན་ཆེན་པོ་དང་ཆབས་ཅིག་པར་ཚལ་ཡང་དགོན་དུ་ཕེབས། ཞང་རིན་པོ་ཆེའི་གཟིགས་སྣང་དང་ཕྱག་བཟོར་གྲགས་པའི་ཡེ་ཤེས་མགོན་པོ་ཕྱག་བཞི་པའི་སྐུ་ལ་ཁྲུས་གསོལ་དང་བཅོལ་དམ་གནང་བས་མགོན་པོའི་ཞལ་ལས་བདུད་རྩི་བབས་པ་དེར་འཁོད་རྣམས་ཀྱིས་མཐོང་ནས་རྒྱུ་མཚན་གསོལ་བ་ན་དཔོན་སློབ་རིན་པོ་ཆེ་ཕེབས་པས་ཡིན་གསུང༌། སྐྱིད་ཤོད་བ་ལམ་ནུབ་ཤེ་མ་མཁར་པའི་བུ་ནད་ཚབས་ཆེན་པོས་བཏབ་སྟེ་སྨན་པས་མི་འཚོ་བར་ཐག་བཅད་པའི་དུས་བྱིན་རླབས་གནང་བས་ནད་ལས་གྲོལ། ལྷ་གདོང་ཤན་ཁ་བའི་མ་འཆི་བར་ཐུག་པར་སྔོན་གྱི་ཕ་མེས་ཆོས་གཅིག་དཔལ་འབྱོར་གྱིས་བསྒྲུབས་པའི་དུར་ཁྲོད་ཀྱི་བདག་མོ་འདྲེ་མོ་ངན་ནེ་མའི་སྒྲུབ་ཁང་ཡོད་པ་དེའི་འཁྲིན་དོགས་སུ་མཁྱེན་ནས་དུར་ཁྲོད་བདག་མོ་ལ་ཐུན་རྫས་དང་བཅས་བཀའ་བསྒོ་གཉེར་བཏད་གནང་བས་དེ་འཕྲལ་གཞི་མེད་དུ་བདེ། གཟིམས་ཁང་ཤར་ཏུ་རྩིས་མགོན་གྱི་འཛིན་གཏོར་བཙུགས་པ་འཇིག་པར་ཉེ་བ་གསང་དུ་བརྗེ་བའི་སྟ་གོན་གྱི་རྙིང་པ་བཏོན་པའི་ཤུལ་གྱི་གཏོར་སྣོད་བདུད་རྩིས་ཁེངས་པ་མཆོད་དཔོན་འཇམ་དབྱངས་རྒྱལ་མཚན་དང་ཞུ་ལུ་ཤེར་རིན་པ་གཉིས་ཀྱིས་ལོངས་སྤྱོད་རྒྱུ་བྱུང་བས་མཚོན་ཡ་མཚན་གྱི་ལྟས་མང་པོ་ཞིག་བྱུང་ཚོད་དུ་མཆིས་སོ། །ཤིས་རྩེའི་དཔོན་ས་བསམ་ཡས་ཆོས་སྐྱོང་གི་འཁོར་དུ་སྐྱེས་པ་མཁྱེན་པའི་ཚེ་བྱང་བཞུ་གནང་བས་ཁུགས་ཟིན་ནས་རྗེས་སྙེགས་ལ་བཙུན་པ་དང་ཨ་ཙ་ར་འདྲ་བ་འོངས་ཏེ་ཕྱིར་ཁྲིད་སོང་བ་ཨ་ལགས་བསོད་ནམས་ཀྱིས་ཞུས་པ་སང་ཉིད་གླུད་སྔོན་དུས་ཀྱི་སྲིད་པའི་དབྱིབས་ཇི་ལྟ་བ་བཟོས་པ་བྱིན་གྱིས་བརླབས། རྣམ་ཤེས་ཁུགས་འཕྲལ་གླུད་སྔགས་རྒྱ་ཏིང་ངེ་འཛིན་གྱིས་བསྔོས་པའི་མཐུས་ལྷ་འདྲེའི་ཕོ་ཉ་རྣམས་རབ་ཏུ་ཚིམ་ནས་ལོག་རྗེས་ལམ་སྟོན་རྒྱས་པར་མཛད་དེ་དག་ཞིང་དུ་བསྐྱལ་ལོ། །གུང་ཐང་གི་བཀའ་ཆོས་རྣམས་གྲོལ་བའི་རྗེ་བཀའ་འགྱུར་བ་ཆེན་པོ་འབྲས་སྤུངས་སུ་ཕེབས། རིང་འཚོའི་རྟེན་འབྱུང་གི་གསུང་ཆོག་གནང༌། རྗེ་བཙུན་རྡོ་རིང་པས་མཛད་པའི་གུར་གྱི་གསང་འཁྲིད། ཚར་ཆེན་གྱི་བྲག་རྫོང་དང་གསང་འཁྲིད་རྒྱུན་ཁྱེར་གཉིས། རབ་གནས་དོན་གསལ་སོགས་ཀྱི་ལྗགས་ལུང་དང༌། རྒྱལ་སྲས་རིན་པོ་ཆེའི་བློ་སྦྱོང་དོན་བདུན་མའི་སྟེང་ནས་ཉམས་འཁྲིད་མདོར་བསྡུས། དཀྱིལ་འཁོར་གྱི་ཆོ་ག་མང་པོའི་ཕྱག་ལེན་དང་ཕྱག་རྒྱ་འཆིང་ཚུལ་གྱི་སྐོར་སོགས་ལ་དོགས་གཅོད་ཞིབ་ཏུ་ཞུས། བསམ་གཏན་པར་རློམ་པའི་ཚུལ་འཆོས་མཁན་འདྲས་གཞན་འབྱོར་ཕུན་ཚོགས་མ་བཟོད་པར་བྱད་རྦོད་ཀྱིས་རྗེའི་སྐུ་ལ་སྡོ་བའི་སྦྱོར་ངན་ཡོད་འཕྲོས་ཐོས་པས། བྲག་རྫོང་མའི་སྲུང་བཟློག་གི་ཐུགས་དམ་གཙོ་བོར་གནང་དགོས་ཚུལ་ཞུས་པར་སྔ་སོར་གནད་བསྣུན་ཁ་ཡར་བྱས་པར་བསམ་སྦྱོར་ངན་པ་ཡོད་འདྲ་བསམ་པ་འགའ་ཞིག་འདས་སོང་བས་རྣམ་ཤེས་འདྲེན་པའི་ནུས་པ་དཀར་བས་དེ་རིགས་ཀྱང་ལས་གསོག་པར་སོང་དོགས་བྱེད་འདུན་མེད་གསུང༌། དགུན་ཡར་ཀླུངས་ཕྱོགས་སུ་ཐེགས། བོང་བུ་ཞེས་པ་ལྕགས་ཡོས་ཀྱི་དཔྱིད་གོང་དཀར་རྡོ་རྗེ་གདན་དུ་ཕེབས་ནས་སྐུ་མཚམས་ཀྱི་བཅད་རྒྱ་ཡུན་རིང་དུ་བསྡམས།