གསོལ་ཆས་དགོས་ཆ་རྣམས་བྱི་ལོའི་སྐབས་ལྟར་ཕུལ་ཞིང་ཟུར་ཀུན་མཁྱེན་ཆེན་པོས་དབུ་མཛད་དོན་གཉེར་ཅན་དུ་མ་ལ་གང་བློ་མ། དབང་གི་སྒྲོལ་མ་དམར་མོ། དུས་འཁོར་གྱི་ཐུན་མོང་སྒྲུབ་པའི་ལྷ་གསུམ། སྨན་བླ་བདེར་གཤེགས་བདུན། ཕྱག་རྡོར་ཨུ་ཙརྻ། བ་རིའི་རྣམ་འཇོམས། སྨེ་བརྩེགས། མི་གཡོ་བ་དཀར་སྔོན། རྟ་མགྲིན་རས་ཆུང་ལུགས། རྟ་ནག་ལྕགས་རལ་ཅན། སེང་གདོང་ནག་པོ། ཛམ་སེར་ནག །སྤྱན་རས་གཟིགས་གཙོ་འཁོར་གསུམ་པ། དུར་ཁྲོད་བདག་པོ། རྣམ་སྲས་དྲག་པོ་བཀའ་ཤིན་ཏུ་གཉན་པ། གསང་སྒྲུབ་ལྗང་སེར་བེ་ཅོན་ཅན། དྲག་བྱེད་རྟ་སྔོན་སྲིན་མོ་བཞི་སྐོར། ནང་གསང་ལྟར་སྒྲུབ་པ་ལྷ་དགུ །དྲག་བྱེད་སེད་ཞོན་ཀླུ་བརྒྱད་ཀྱིས་བསྐོར་བ། དྲག་བྱེད་རྐང་ཐང་ལྷ་བརྒྱད། མདུང་དམར་ཅན་ལྷ་བཅུ་གསུམ། ཡང་གསང་དྲག་པོ་སྲིན་པོ་བཞི་སྐོར། མཐིང་ཁ་ཞལ་གསུམ་ཕྱག་དྲུག་པ་ལས་མཁན་མདུང་དམར་ཅན་དང་བཅས་པའི་གཙོ་འཁོར་གཉིས། གར་མཁན་མཆོག་ལྗང་གུ་ཞལ་གསུམ་ཕྱག་བཅོ་བརྒྱད་པ་ལྷ་བརྒྱད། གར་མཁན་མཆོག་དམར་སྨུག་ཞལ་གསུམ་ཕྱག་བཅོ་བརྒྱད་པ། དཀར་པོ་ཚེ་འཕེལ་ལྷ་དགུ། ཡང་གསང་མདུང་དམར་ཅན་ཕྱག་མཚན་བཞི་པ། གུར་གསང་འཁྲིད་རྣམས་ཀྱི་རྗེས་གནང༌། བྲན་བདུད་ཀྱི་རྗེས་གནང་ཐུན་མོང་མ་ཡིན་པ། ཞལ་སྒྲུབ་དུས་ཐུན་མོང་མ་ཡིན་པ། ཁྱུང་ཞལ་ཅན། སེང་གདོང་ནག་པོ། ལྷ་མོ་རྡོ་རྗེ་རབ་བརྟན་མ་རྣམས་ཀྱི་རྗེས་གནང༌། ཕག་དཀར་ཤེས་རབ་གསལ་བྱེད་དང་རྟ་མགྲིན་སྐྱེར་སྒང་ལུགས་ཀྱི་བྱིན་རླབས། རྡོ་རྗེ་ནམ་མཁའ་ལྡིང་གསེར་མིག་འཁྱིལ་བའི་རྗེས་གནང་ལུང་བཅས་སྒྲུབ་ཐབས་རྒྱ་མཚོ་ལས་སྐུའི་རྣམ་འགྱུར་དང་སྔགས་མི་འདྲ་བ་བརྒྱ་བཞི་བཅུའི་རྗེས་གནང་དང་རྒྱ་གཞུང་གི་ལུང༌། དུས་འཁོར་གྱི་བདག་པོ་ཆེན་པོ་མ་གཏོགས་སྐུ་གསུང་ཐུགས་ཡོངས་རྫོགས། གཤིན་རྗེ་གདོང་དྲུག །རྣམ་སྣང་མངོན་བྱང༌། རྣམ་འཇོམས་མཐིང་ནག་ལྷ་བཅུ་དགུ །རིགས་གསུམ་སྤྱི། གདུགས་དཀར་ལྷ་བཅུ་བདུན། སྲུང་བ་ལྷ་ང་གཅིག །མི་འཁྲུགས་པ་ལྷ་མོ་བརྒྱད་ཀྱིས་བསྐོར་བ། ས་ཕུར་ལྷ་ཁྲའི་སྟོད་ལས་རྣམས་ཀྱི་དབང་དང་སྨད་ལས་དྲག་པོའི་རྗེས་གནང༌། ཨེ་ཀ་ཛ་ཏཱིའི་སྲོག་གཏད་དང་ལུང༌། མ་ཎི་ཀ་ནཱ་ཐས་འཇམ་དབྱངས་མཁྱེན་བརྩེར་གནང་བའི་གསར་འགྱུར་ཨྱོན་སྐུ་གསུམ་སྒྲུབ་བརྒྱ་འགྱུར། དེའི་ལོ་རྒྱུས་འགྲེལ་པ་དང་བཅས་པ་འཇམ་དབྱངས་མཁྱེན་བརྩེའི་ཟིན་བྲིས་ཀྱི་ལུང༌། དཀར་བདུད་ལྕམ་དྲལ་གྱི་སྒྲུབ་སྐོར། ལམ་སྐོར་ཕྱི་མ་བརྒྱད་ཀྱི་ལུང་ཡོངས་རྫོགས། ཚར་གསུམ་ཁུག་པའི་བྱིན་རླབས། གསུང་ངག་སློབ་བཤད་ཀྱི་ཆོས་འབྱུང་ཟིན་བྲིས་འཇམ་དབྱངས་མཁྱེན་བརྩེས་མཛད་པ། ཚར་ཆེན་གྱི་ཀྱེ་རྡོར་བསྐྱེད་རིམ་སོགས་ཆོས་སྦྱིན་རྒྱ་ཆེར་མཛད་ཅིང་རྗེ་བླ་མ་ཟུར་ཆེན་ལ་སྔ་འགྱུར་གཙོ་བོར་གྱུར་པའི་ཟབ་ཆོས་མང་དུ་གསན། དྲན་པ་ནམ་མཁའ་དང་གནུབས་ཆེན་གྱི་རྣམ་པར་སྤྲུལ་པ་དར་རྒྱས་ཆོས་སྡིངས་པ་འཕྲིན་ལས་ལྷུན་གྲུབ་བྱོན་པར་དཔོན་སློབ་གཉིས་ཀས་ལྷན་དུ་པཎ་ཆེན་པདྨ་དབང་རྒྱལ་གྱི་རིགས་འཛིན་ཡོངས་འདུས་ཀྱི་དབང་ལུང༌། ལྷོ་བྲག་གུ་རུ་ལྷ་ཁང་ནས་ཡང་གཏེར་གྱི་སྐོར། རཏྣའི་ཕུར་པ་ཡང་གསང་བླ་མེད། རྟ་ཕག་གསང་སྒྲུབ། ཐུགས་རྗེ་ཆེན་པོ་ཞི་དྲག་ལམ་གྱི་ཆ་རྐྱེན་གསང་བ་སྙིང་པོ་འདུས་པ། སྐུ་གསུམ་ཡོངས་རྫོགས་རྩ་གསུམ་འབྲས་བུའི་དོན་འཁྲིད། ཕྱག་རྒྱ་ཆེན་པོ་མུན་སེལ་ཉི་མའི་སྙིང་པོ། སྐྱེས་རབས་ལུང་གི་ལྡེ་མིག་སོགས་ཟབ་གཏེར་ཁ་ཐོར་བའི་སྐོར། མནལ་ལམ་དག་སྣང་གི་སྐོར། རིགས་འཛིན་རྒོད་ལྡེམ་གྱི་གུ་རུ་མཐིང་ཁ་སྤྱན་མངས་ཀྱི་སྒྲུབ་ལུང༌། ལས་འབྲེལ་རྩལ་གྱི་དྲེགས་འདུལ་སྒྲུབ་ཐབས་ཆིག་བརྒྱུད་མའི་ལུང༌། ཀུན་མཁྱེན་ཀློང་ཆེན་པའི་ཡིད་བཞིན་མཛོད། ཤེས་རབ་མེ་འབར་གྱི་རྫོགས་ཆེན་འཁོར་འདས་རང་གྲོལ་གྱི་དབང་ལུང༌། སྤ་གྲོ་གཏེར་སྟོན་ཚེ་རིང་རྡོ་རྗེའི་རྫོགས་ཆེན་ཅི་ཏིའི་གསལ་བྱེད་ནོར་བུའི་དབང་ལུང༌། དྲི་མེད་ཀུན་དགའི་ཐུགས་རྗེ་ཆེན་པོ་ཡེ་ཤེས་འོད་མཆོག །ལྷོ་ལས་འཕྲོ་གླིང་པ་ནམ་མཁའ་རྡོ་རྗེའི་རྡོ་རྗེ་སེམས་དཔའི་ཐུགས་སྒྲུབ་ཀྱི་དབང་ལུང༌། ཨེ་སྤེལ་ལྕོག་ལས་འཕྲོ་གླིང་པའི་བླ་སྒྲུབ་ཕྱི་ནང་གསང་གསུམ་གྱི་དབང་ལུང༌།