ངེད་རྡོ་རྗེ་ཕྲེང་བའི་དབང་ཚོགས་ཆེན་ལ་འབུལ་བའི་གྲབས་ཡུལ་གྱི་སྐབས་སུ་སླེབས་པ་སྔར་ཕྱག་ལེན་རྣམས་ལ་རྟོག་འཇུག་དང་དོགས་གཅོད་ཞིབ་བར་ཞུས་ཁུལ་ཡིན་ནའང་གསང་སྔགས་ཀྱི་ཕྱག་བཞེས་ཆེས་ཞིབ་ཅིང་ཕྲ་བ་དང་རང་རེ་བློ་གྲོས་དམན་པའི་གཤིས་ཀུན་རྟོག་གི་སྤྲོས་པ་བན་བུན་དུ་ཤར་བའི་ཡིད་གཉིས་རྣམས་ལ་དོགས་སེལ་གྱི་ཤོག་དྲིལ་ཕུལ་བར་བཀའ་མཆན་ཞིབ་པར་སྩལ། འདི་ལོ་ཆར་དཀོན་པའི་ལོ་ཏོག་རྣམས་ཐན་པའི་འཇིགས་པས་ཉེན་པ་ཐུགས་ཀྱིས་མ་བཟོད་པར་རྫས་སྔགས་ཏིང་ངེ་འཛིན་ལ་བརྟེན་པའི་ཆར་འབེབས་ཀྱི་ཕྱག་ལེན་གནང་ཡང་ལྷ་འདྲེའི་ཚུབ་ལྷོངས་ལྟ་བུས་ཕེབས་དཀའ་བར་དཔལ་ཨྱོན་ཆེན་པོ་ལ་གདུང་ཤུགས་དྲག་པོས་གསོལ་འདེབས་གནང་བས་ཀླུ་དབང་གླིང་གི་རྒྱ་དང་མཉམ་པའི་སྤྲིན་ལས་ཆར་བབས་ཤིང་གཞན་དུ་སྤྲིན་མ་འཁྲིགས་པས་དེ་ལོ་ཚོས་ལས་ཀྱི་བུད་ཤིང་ལ་ཁ་རེག་གི་ནགས་བཅད་པས་ཁྱུང་བཙུན་ཁྲོས་པའི་དེ་ཕྱོགས་སུ་ཡམས་དང་ལྕེ་འབབ་པ་སོགས་བྱུང་སྣང་བས་དེ་དང་དབྱིབས་མཚུངས་པར་དགོངས་ཏེ་རྡོ་རྗེ་དཔལ་གྱི་ཡུམ་ལ་གཏོར་བསྔོས་དང་བཅས་དམ་བསྒྲགས་པས་ཁ་རེག་གི་རི་རྩེ་ལས་ཆུ་འཛིན་དཀར་པོ་ལང་ལོང་དུ་གཡོས་ཤིང་ཐོག་མར་དྲག་ཆར་གྱི་ལྷོངས་ཆེ་ཙམ་དང་བཅས་རིམ་གྱིས་སྤྲིན་ཕྱོགས་ཀུན་ཏུ་ཁྱབ་པའི་ཆར་གྱི་རྒྱུན་ཆེན་པོས་མྱུ་གུའི་ཚོགས་ཀྱི་བསྐྱེད་རབ་ཏུ་བསྲིངས་ནས་ཡུལ་ཁམས་མང་པོར་འབྲུའི་མཆོད་སྦྱིན་དོན་གྱིས་སྩལ་ལོ། །ཆོས་སྡེ་འདི་ག་དང་ཕྱོགས་འདུས་ཀྱི་དོན་གཉེར་ཅན་ཁ་ཤས་ལ་གཤིན་རྗེ་གདོང་དྲུག །སངས་རྒྱས་མཉམ་སྦྱོར། འཇིགས་བྱེད་བཅུ་གསུམ་མ། མི་འཁྲུགས་པ་ལྷ་དགུ་རྣམས་ཀྱི་དབང༌། ཚེ་དཔག་མེད་ལྷ་དགུའི་དབང་བརྒྱ་རྩ། གུར་ལྷ་བཅུ་བདུན། བཅུ་གཉིས། བརྒྱད་མ་གསུམ་གྱི་དབང༌། བྲག་རྫོང་མའི་ཕྱི་འཁྲིད་དང་ཞལ་གྱི་གསང་འཁྲིད་གཉིས་ཀྱི་ཉམས་འཁྲིད། རིན་ཆེན་གླིང་པའི་ན་ག་རཀྴའི་རིག་གཏད། དབྱུ་གུ་སྤུན་གསུམ་གྱི་སྒྲུབ་སྐོར། མགོན་པོད་ནས་ཁ་ཤས་ཀྱི་ལུང༌། མགོན་པོ་མ་ནིང་གི་ཆར་འབེབས། དབུ་མ་ལུགས་ཀྱི་སེམས་བསྐྱེད་སྤྱན་རས་གཟིགས་ཀྱི་དམར་འཁྲིད། རབ་འབྱམས་སྨྲ་བ་རིན་ཅེན་རྒྱ་མཚོར་གཡུ་ཐོག་སྙིང་ཏིག་གི་དབང་ལུང༌། ཁྲོ་བོ་སྨེ་བརྩེགས་དང་ཁྲོ་མོ་སྨེ་བརྩེགས་ཀྱི་རྗེས་གནང༌། དམར་ཆེན་སྐོར་གསུམ། སྐྱེས་རབས་སོ་བཞིའི་ལུང་སོགས་ཆོས་བཀའ་སྔ་ཕྱི་དུ་མར་གནང༌། དགའ་བ་ཞེས་པ་ཆུ་འབྲུག་ཧོར་ཟླ་གཉིས་པའི་ནང་དུ་ངེད་རྒྱ་ནག་ལ་འགྲོ་བའི་ངོས་འཕྲང་ལ་ཕེབས་ནས་གཟིམས་ཆུང་མགོན་ཁང་ལྕང་ལོ་ཅན་དུ་རིང་པོར་གནས་པའི་རྟེན་འབྲེལ་གྱི་ཆོ་ག་རིགས་མི་གཅིག་པ་གསུམ་ཙམ་ཞིག་གནང༌། ཚེ་དབང་ཁ་ཤས་དགོས་ཚུལ་ཕེབས་པ་བཞིན་འཆི་མེད་དཔལ་སྟེར་གྱི་སྒོ་ནས་ཕུལ་བ་བཅས་དེ་ཀའི་སྟེང་ནས་ངེད་རང་གིས་ཀྱང་ཚར་གཅིག་ཞུས་ཤིང་འཕྲལ་ཡུན་གྱི་བསླབ་སྟོན་མང་དུ་གནང་བར་རྒྱ་ནག་ནས་རིང་པོར་མི་ཐོགས་པར་ལྡོག་པའི་འདུན་པ་ཡོད་པས་དེ་བར་རྡོ་རྗེའི་རྣལ་འབྱོར་མཆོག་ལས་མི་གཡེལ་བའི་སྲུང་འཁོར་དང་འཆད་ཉན་ལ་ཐུགས་རྩོལ་གང་ཆེའི་ངོས་གཙོ་བོར་བསྟན་འགྲོའི་གཉེན་དུ་འཚོ་གཞེས་གྱི་ཐབས་ཚུལ་ལྷོད་མེད་དགོས་པའི་སྙན་འབུལ་དང་བརྟན་བཞུགས་ཕུལ། དེ་ནས་གུང་ཐང་དུ་ཐེགས་པའི་ཟླ་བ་ཕྱེད་གཉིས་ཙམ་གྱི་བར་ཟུར་ཆེན་ཆོས་ཀྱི་རྒྱལ་པོར་གཤེད་དམར་ལྷ་ལྔའི་དབང་དང་སྤྲོས་མེད་ཀྱི་ཉམས་འཁྲིད། རྭ་ཆེན་གྱི་སྒྲུབ་དཀྱིལ་ལ་འཇམ་དབྱངས་མཁྱེན་བརྩེའི་ལྷན་ཐབས་སྦྱར་བའི་རྭ་ལུགས་ཐུན་མོང་མ་ཡིན་པ་ལྷ་བཅུ་གསུམ་མའི་དབང༌། རྭ་འཁྲིད་མཁའ་འགྲོ་སྙན་བརྒྱུད་ཀྱི་ཉམས་འཁྲིད། རྭ་ཆེན་ཤེས་རབ་རྒྱལ་མཚན་གྱི་དཀར་ཆག་ཏུ་གསལ་བ་དང་དེར་མ་འདུས་པའི་ཁ་སྐོང་བཅས་པའི་རྭ་པོད། འབྲི་གུང་དཔལ་འཛིན་གྱི་པོད་ཆུང༌། བུ་སྟོན་ཐམས་ཅད་མཁྱེན་པའི་གསང་འདུས་མི་བསྐྱོད་པའི་འཁྲིད་ཡིག་ཟ་མ་ཏོག་ལ་འཇམ་དབྱངས་མཁྱེན་བརྩེའི་ཁ་འབྱེད་ལྷན་ཐབས་སྦྱར་བའི་རིམ་ལྔའི་དམར་འཁྲིད། ཁ་ཆེ་པཎ་ཆེན་ལུགས་ཀྱི་བདེ་མཆོག་དཀར་པོའི་ཉམས་འཁྲིད། རིགས་འཛིན་ཆེན་པོ་ལེགས་ལྡན་རྡོ་རྗེས་ཆུ་བོ་རི་ནས་གདན་དྲངས་པའི་བླ་མ་སྐུ་གསུམ་གྱི་ཉམས་འཁྲིད། འཁྲིད་ཡིག་སོ་སོའི་ལུང༌།