[A:༥༡༢]པའི་འཇའ་ས་ལ་གསེར་གྱི་ཐམ་ཀ །ཤེལ་གྱི་ཉིན་ཤན། དངུལ་གྱི་སྒོར་མོ་ལུང་དང་བཅས་ལས་ཀ་གནང་བས་གནས་གསར་སྟོང་དཔོན་དུ་གྲགས། རྒྱལ་པོ། སྔགས་འཆང༌། གེ་སར་གྱི་ཡོན་ཏན་ཚང་བའི་མི་བདག་རིམ་བྱོན་ལས་སྟོང་དཔོན་ཀུན་དགའ་རྡོ་རྗེའི་སྲས་ནང་སོ་ཆོས་ཀྱི་རྒྱལ་པོའི་ཁབ་ཏུ་སྙན་བརྒྱུད་ཀྱི་མངའ་བདག་འཇམ་དབྱངས་ཆོས་རྗེའི་ལྕམ་རྡོ་རྗེ་རྣལ་འབྱོར་མའི་སྤྲུལ་པ་དཔལ་ལྡན་འཛོམ་པ་བྱོན་པར་ལྕམ་སྲིང་བརྒྱད་བྱུང་བའི་བགྲེས་པ་ནང་སོ་རྣམ་རྒྱལ་དཔལ་བཟང་སློབ་དཔོན་ཆེན་པོ་པདྨའི་རྣམ་འཕྲུལ་སྐུ་ཞང་འཇམ་དབྱངས་ཆོས་རྗེ་ནམ་མཁའ་རྒྱལ་མཚན་ཡབ་སྲས་གསུམ་བསྟེན་ནས་འཁོན་གྱི་ཡབ་ཆོས་རྡོ་རྗེ་ཕུར་པས་གཙོས་གསར་རྙིང་གི་ཟབ་ཆོས་མང་པོ་ཞུས་ཤིང་བསྙེན་སྒྲུབ་བཟླས་སྒོམ་མཐར་ཕྱིན། སློབ་དཔོན་ཆེན་པོའི་བསྙེན་ཕུར་མེ་འབར་བཞིན་པ་རྩིས་ཀྱི་མཆོད་རྟེན་ནག་པོ་ནས་བཞེས། དགུང་ལོ་བརྒྱད་ཅུ་རྩ་ལྔར་ཕེབས་ནའང་སྐྱེས་དར་མའི་ཡང་རྩལ་དང་ལང་ཚོ་ལྟར་གྱུར་པའི་གྲུབ་མཚན་ངོ་མཚར་བ་སྟོན། རིན་ཆེན་སྒང་པ་སྒོས་དང་ཡོན་མཆོད་དུ་གྱུར་པའི་ཞལ་ངོ་ཕྱི་མ་རྣམས་ཀྱིས་རང་བསྟན་གྱི་སྲོག་འཐུད་པའི་རྟེན་འབྲེལ་གྱི་སྒོ་འགྲིག །དེ་འོག་ཕྱག་ན་རྡོ་རྗེའི་སྤྲུལ་པ་ནང་སོ་མགོན་པོ་རིན་ཅེན་གྱིས་མགོན་པོ་ཞལ་གཟིགས་ཤིང་ཐལ་རྡེབ་ཀྱིས་ལོག་འདྲེན་སྒྲོལ་བ། རི་དྭགས་སོགས་ལ་བྱ་གླག་གིས་འཚེ་བའི་ཚེ་སྔགས་རྒྱ་ཏིང་འཛིན་ཙམ་གྱིས་སར་ལྷུང་བ། མི་ཆོས་ལའང་སྒྱུ་རྩལ་འགྲན་ཟླ་དང་བྲལ་བར་གྲགས། དེ་འོག་འཇམ་དབྱངས་ཀུན་དགའ་བློ་གྲོས་ཞེས་གཞུང་ལུགས་རྒྱ་མཚོར་སྦྱངས་པ་ཆེ་ཞིང་དངོས་སྟོབས་