[A:༥༡༩]གདོང་ངར་ཆེ་བ་གེ་སར་རིགས། །རླུང་གིས་མཐོན་པོར་བཏེག་པའི་འདབ་ཆགས་སྒྲོ། །འགྲོ་མངས་རལ་པའི་རྩེ་མོར་སྟེས་དབང་ལས། །གཡེངས་མིན་ཁུངས་འབྲེལ་ལུས་ཕྲའི་འགྲམ་ཆང་གིས། །དཔྱོད་ལྡན་བློ་ཡི་བ་ཀུ་ལ་དེ་བཞད། །རྡུལ་མང་ཕང་པར་ཉལ་བའི་ཁྲི་སྟན་སྟེང༌། །ཆེན་པོར་བཀུར་བར་མི་བསྙེངས་བྱང་ཆེན་ལ། །གཞོལ་བས་ཨིནྡྲ་བྷཱུ་ཏི་རྣ་རྒྱན་གྱིས། །ལྗོངས་འདིར་གཟུགས་ཅན་གཉིས་པ་བཟུང་བ་བཞིན། །དེའང་ཚིགས་གསུམ་པ། འཇམ་དབྱངས་མཁྱེན་བརྩེའི་དབང་ཕྱུག་བསྟན་པའི་རྒྱལ་མཚན་དཔལ་བཟང་པོའི་ཞལ་སྔ་ནས་ཀྱི་ཡོངས་གྲགས་ཀྱི་རྣམ་པར་ཐར་པ་དགུང་ལོ་སུམ་ཅུ་སོ་བརྒྱད་ཡན་གྱི་རྟོགས་བརྗོད་རང་ཉིད་ཀྱིས་མཛད་པའི་ངོ་མཚར་སྙེ་མར་གསུངས་པ་སྨོས་མ་དགོས། དེ་ནས་ཀྱང་ལོ་ཕྱེད་དྲུག་ཙམ་གྱི་བར་ཞིང་འདིར་བཞུགས་པས་འཕྲོ་འཐུད་ཐུབ་ན་ལེགས་པར་སྣང་ཡང་ཟིན་བྲིས་སོགས་ངེས་ཏིག་མ་འབྱོར་ལ། སྐུ་ཚེ་སྔོན་མ་རྣམས་སུ་གངྒཱའི་ཀླུང་གི་རྡུལ་སྙེད་ལས་འདས་པའི་ཞིང་ཁམས་རྒྱ་མཚོར་མཆོག་དམན་བར་པའི་ཚུལ་སྣ་ཚོགས་པས་འགྲོ་བའི་དོན་མཛད་པའི་མཐའ་ག་ལ་རྟོགས། འོན་ཏེ་སྐྱེ་བ་རིམ་བརྒྱུད་དང་ཐུགས་རྒྱུད་གཅིག་པའི་སྤྲུལ་པ་སོགས་ཀྱིས་བསྟན་འགྲོའི་སྨན་ཡོན་དུ་གྱུར་པའི་རིམ་པ་ནི། རྗེ་ཉིད་ཀྱི་ཞལ་གསུངས་མར། ན་མོ་གུ་རུ་བྷྱཿ རྒྱལ་བ་སྐུ་དངོས་ཨྱོན་ཆོས་ཀྱི་རྗེ། །རྡོ་རྗེ་འཆང་དབང་ཀུན་དགའ་ལེགས་པའི་ཞབས། །སྐུ་དྲིན་མཉམ་མེད་བློ་གསལ་རྒྱ་མཚོ་སོགས། །སྐྱབས་མཆོག་བླ་མ་རྣམས་ལ་གསོལ་བ་འདེབས། །ཨྱོན་དྲུང་ན་ལང་འགྲོ་དཀོན་ཅོག་འབྱུང༌། །