[A:519]gdong ngar che ba ge sar rigs/ /rlung gis mthon por bteg pa'i 'dab chags sgro/ /'gro mangs ral pa'i rtse mor stes dbang las/ /g.yengs min khungs 'brel lus phra'i 'gram chang gis/ /dpyod ldan blo yi ba ku la de bzhad/ /rdul mang phang par nyal ba'i khri stan steng / /chen por bkur bar mi bsnyengs byang chen la/ /gzhol bas indra bhU ti rna rgyan gyis/ /ljongs 'dir gzugs can gnyis pa bzung ba bzhin/ /de'ang tshigs gsum pa/ 'jam dbyangs mkhyen brtse'i dbang phyug bstan pa'i rgyal mtshan dpal bzang po'i zhal snga nas kyi yongs grags kyi rnam par thar pa dgung lo sum cu so brgyad yan gyi rtogs brjod rang nyid kyis mdzad pa'i ngo mtshar snye mar gsungs pa smos ma dgos/ de nas kyang lo phyed drug tsam gyi bar zhing 'dir bzhugs pas 'phro 'thud thub na legs par snang yang zin bris sogs nges tig ma 'byor la/ sku tshe sngon ma rnams su ganggA'i klung gi rdul snyed las 'das pa'i zhing khams rgya mtshor mchog dman bar pa'i tshul sna tshogs pas 'gro ba'i don mdzad pa'i mtha' ga la rtogs/ 'on te skye ba rim brgyud dang thugs rgyud gcig pa'i sprul pa sogs kyis bstan 'gro'i sman yon du gyur pa'i rim pa ni/ rje nyid kyi zhal gsungs mar/ na mo gu ru bhyaH rgyal ba sku dngos ayon chos kyi rje/ /rdo rje 'chang dbang kun dga' legs pa'i zhabs/ /sku drin mnyam med blo gsal rgya mtsho sogs/ /skyabs mchog bla ma rnams la gsol ba 'debs/ /ayon drung na lang 'gro dkon cog 'byung / /