[A:༥༢༡]རྒྱ་མཚོ་ཕལ་ཆེར་བྲན་དུ་འཁོལ། །འཕྲིན་ལས་ཐོག་མེད་སྒྲུབ་ལ་གསོལ་བ་འདེབས། །འདི་ནས་འཕོ་ཚེ་བྱང་ཕྱོགས་ལྕང་ལོ་ཅན། །ཞིང་དེར་ཕ་རྒན་དྲུང་དུ་ཐོག་མར་འགྲོ། །དེ་ནས་ཨྱོན་ཟངས་མདོག་དཔལ་རིའི་རྩེར། །སྐྱེ་བའི་རྟེན་འབྲེལ་བསྒྲིག་ལ་གསོལ་བ་འདེབས། །དེ་ལྟར་ཁྱེད་ལ་གུས་པས་གསོལ་འདེབས་ན། །དུས་འདི་ནས་བཟུང་ཚེ་རབས་ཐམས་ཅད་དུ། །ནམ་ཡང་འབྲལ་མེད་མཉེས་པ་ཀུན་བསྒྲུབས་ནས། །ཆམ་གཅིག་གདོད་མའི་ཀློང་དུ་གྲོལ་བར་ཤོག །ཅེས་པ་འདི་སྙིང་ནས་དད་ལྡན་གཉོས་དཀའ་བཅུ་པ་ཆོས་རྒྱན་གྱིས་བསྐུལ་བའི་ངོ་མ་ཆོགས་པར་ངེད་རང་གི་ཁོང་ཁྲག་ཤོག་བུའི་ལོགས་ལ་བཀོད་པ་ཡིན་པས། ཐམས་ཅད་ལ་བསྟན་ན་ངེད་ཀྱི་ཚེ་ལ་གནོད་པས་ཤིན་ཏུ་གསང་ཞིང་སྦས་པའི་ཚུལ་དུ་མཛད་པ་གལ་ཆེ་ཆེ། དམ་ཚིག་ལ་དགོངས་མཛོད་ཅིང༌། དགེ་སློང་ཆོས་རྒྱན་ལ་བསྟན་ཀྱང་བཟོད། ཚ་བོ་བཙུན་ཆུང་རྣམས་སྣོད་ལྡན་ཡིན་ཀྱང༌། ན་སོ་གཞོན་པས་གཞན་ལ་ཤོར་ཉེན་ཡོད་པ་ཐེང་གཅིག་ལ་མ་སྟོན་མཛོད། ས་མ་ཡ། ཞེས་པ་དང་ཤེས་རབ་རྒྱ་མཚོ། བུདྡྷ། སངས་རྒྱས་ལྷུན་གྲུབ། སྦྱིན་པ་དཔལ་བཟང༌། དཀོན་མཆོག་ལེགས་པ་ལྔས་ཞུས་ངོར་གནང་བའི་ཀུན་ཁྱབ་ཆོས་དབྱིངས་མ་གཉིས་འདུག་པ་རྒྱས་བསྡུས་ཙམ་དུ་མཐོང་བས་གཅིག་ཏུ་བྱས་ན་སྤྲུལ་གཞི་རྒྱལ་ཀུན་ཡབ་གཅིག་འཇམ་དབྱངས། འོ་སྐོལ་གྱི་སྟོན་པའི་དྲུང་དུ་ཤེས་རབ་ཅན་གྱི་མཆོག་ཤཱ་རིའི་བུ། ལྷ་སྲས་ཁྲི་སྲོང་ལྡེའུ་བཙན། རྫུ་འཕྲུལ་གྱིས་ཐོག་ཆེན་མདའ་ལྟར་འཕེན་པའི་ལང་འགྲོ་དཀོན་མཆོག་འབྱུང་གནས། མངའ་བདག་ཉང་གི་