[A:༥༢༦]གཅིག །དཀྱིལ་འཁོར་རྒྱ་མཚོའི་རིགས་བདག །རིག་པ་འཛིན་པ་དང་མཁས་དང་གྲུབ་པ་ཡོངས་ཀྱི་དེད་དཔོན། རྡོ་རྗེ་འཛིན་པ་ཀུན་གྱི་རལ་བའི་ཁྲི་ལ་ཞབས་ཀྱི་པདྨ་ངལ་གསོ་བ། རྗེ་བཙུན་རྡོ་རྗེ་འཆང་ཆེན་པོ་མཁྱེན་བརྩེའི་དབང་ཕྱུག་བསྟན་པའི་རྒྱལ་མཚན་དཔལ་ལྡན་སྐལ་བ་བཟང་པོའི་ཞལ་སྔ་ནས་དེ་ཉིད་ཀྱི་རྣམ་པར་ཐར་པ་ནི་བསམ་གྱིས་མི་ཁྱབ་ཅིང་བརྗོད་ཀྱིས་མི་ལང་མོད། འོན་ཀྱང་མདོ་ཙམ་ཞིག་བརྗོད་ན། རྗེ་དེ་ཉིད་ཀྱི་མཛད་པའི་ཚུལ་ཆེ་ལོང་ཙམ་ནི་རྣམ་ཐར་ཆེན་མོར་རྟོགས་པར་བྱ་ཞིང༌། དེ་བས་ཀྱང་ཆེས་སྙིང་པོར་གྱུར་པའི་གསང་བའི་རྟོགས་བརྗོད། གདུལ་བྱ་སྣོད་ལྡན་དད་པ་དང་དམ་ཚིག་ལ་གནས་པ་ལྷག་བསམ་ལ་ཉེས་པའི་དྲི་མ་དང་བྲལ་བ་རྣམས་ཀྱི་སྤྱོད་ཡུལ། ལོག་ལྟ་དང་ང་རྒྱལ་འཛིན་པ་ཀུན་གྱི་རྣ་བའི་ལམ་ཙམ་དུ་ཡང་མི་བསྒྲག་པའི་གསང་ཆེན་དཔའ་བོ་ཌཱ་ཀིའི་ཚོགས་ཀྱི་ཟབ་པ་བས་ཆེས་གསང་བའི་རྣམ་པར་ཐར་པ་གསང་ཆེན་བདུད་རྩིའི་ཆུ་རྒྱུན་ཞེས་པ་དེ་ལ། རྗེ་དེ་ཉིད་ཀྱིས། ས་ཁྱི་ཟླ་བ་དང་པོའི་ཚེས་བཅུའི་ནུབ་རྨི་ལམ་དུ། ངའི་མལ་སའི་འཁྲིས་ན་མགར་མོ་གཞོན་ནུ་མ་ཞིག་གཅེར་བུ་སྐྲ་བཤིག་ནས་འདོད་པ་བསྟེན་པའི་གྲབས་སུ་འདུག་པ་ང་སྙིང་ནས་ངོ་ཚ་ཞིང་འདི་འདྲ་བྱེད་དུ་མི་ཉན་སྙམ་ནས་དེ་ལ་འུར། ང་རང་འབྲོས་པའི་གྲབས་བྱས་པས་དེ་ཙུག་མ་བྱེད་འདི་ལ་སྐྱོན་མེད། ཁྱོད་ཀྱིས་ཡུན་རིང་པོ་ནས་ང་བོས་པ་ཡིན་མོད་ཟེར་བས། ངས་ནི་ཁྱོད་འབོད་པ་ལྟ་ཅི། ད་ལམ་ལས་མཐོང་ཡང་མ་མྱོང༌། སྡོམ་པ་ཉམས་ནས་དམྱལ་བར་སྐྱེ་བ་ལས་སྐྱོན་ཆེ་བ་གར་ཡོད་བྱས། ང་ཐོང་བྱས་སྤྲུགས་པས། ཁྱོད་ལ་མི་དགོས་ན་ང་