[A:༥༢༧]འདོད་ཆགས་ཐམས་ཅད་དང་བྲལ་བ་ཞིག་ཡིན་ཟེར་ནས་ནམ་མཁར་འཕགས་སོང་བ་དང༌། རྗེ་བཙུན་རྡོ་རྗེ་ཕག་མོ་ཞལ་གཉིས་མ་ཕག་ཞལ་གྱི་སྨིན་མཚམས་དང༌། བྷ་གའི་ནང་ན་དགའ་འཁྱིལ་འཁོར་བ་ཞིག་ཏུ་གྱུར་སོང་བས་དེའི་ཞབས་ལ་འཇུས་གསོལ་བ་བཏབ་པས། ད་ཚེ་འདིར་རྗེས་སུ་འཛིན་པའི་སྐལ་བ་མེད། ཡི་གེ་སོ་གཉིས་པོ་འབྲུ་འབུམ་སྦྱིན་སྲེག་དང་བཅས་པ་བཟློས། རང་སེམས་ཕག་མོའི་རང་ཞལ་མ་ཡེངས་པར་སྐྱོངས། སྙིང་རྗེ་བྱང་སེམས་ཀྱིས་འགྲོ་བ་ལ་ཕན་ཐོགས། བར་དོར་རྗེས་སུ་འཛིན་ནོ་གསུངས་ནས་ཡལ་སོང༌། གཉིད་སད་པ་ན་སྐྱོ་སྣང་དྲག་པོ་སྔར་ཡོང་མ་མྱོང་བ་ཞིག་གདའའོ། །མེ་ལུག་ཟླ་བ་བཅུ་གཉིས་པའི་ཉེར་ལྔའི་ནུབ་རྨི་ལམ་དུ། ཨོ་ལོ་དགེ་བསྙེན་དང་བློ་གྲོས་བཟང་རོགས་ལ་ཁྲིད་དེ་རྫ་རི་དཀར་པོ་རྩེ་མོ་རྣོ་བ་རོང་ངེ་བ་ཞིག་གི་ལྡེ་བས་ལ་ཕྱིན་ནས་རྒྱ་གར་ནུབ་ཕྱོགས་ལ་འགྲོ་རྒྱུ་ཡིན་ཟེར། བསམ་འགྲུབ་ཡིན་སྙམ་པ་ཞིག་གིས་རྟ་སྔོན་པོ་སྒ་སྲབ་ཆབ་པ་བྱས་པ་ཞིག་གདོང་ལ་ཁྲིད་འགྲོ་གི་འདུག །ངས་བལྟས་པས་རིའི་ལོགས་ཐམས་ཅད་ལ་རྡོ་དང་བྱེ་མ་རླུང་གིས་བཏབ་པ་འདྲ་བའི་སྐྱ་ཉོལ་ཉོལ་ལས་གྲུབ་པའི་ཡི་གེ་ལཱཉྪ་དང༌། དབུ་ཆེན་གྱི་དབྱངས་གསལ་དང༌། ཨཥྟ་དང༌། བདེ་མཆོག་གི་རྩ་སྔགས་སོགས་ཧྲམ་མེ་འདུག །རི་གདོང་དེ་ནས་མར་བབས་པའི་སྟེང་ཁ་ཞིག་ན། དབུས་ན་རྣམ་རྒྱལ་མཆོད་རྟེན་ཆེན་པོ་ཞིག་དང༌། མཚམས་བཞི་ན་དེའི་ཕྱེད་ཙམ་གྱི་མཆོད་རྟེན་རེ་འདུག །ངའི་ཡིད་ལ་རྗེ་བཙུན་རྡོ་རྗེ་འཆང་གི་ཕྱི་རྟེན་ཡིན་པ་ལ། ད་ལོ་ཁོང་ཚོ་དམག་གིས་བྲེལ་ནས་སྐུ་དཀར་ཡང་མ་གསོལ་བ་