[A:༥༤༠]ལྟ་བུ་དང་གསལ་རྙོག་མེད་འོད་ཀྱི་རང་བཞིན་ཞིག་ཇ་དཀར་ཡོལ་གང་ལྷོད་བྱས་འཐུང་བའི་ཡུན་ཙམ་གྱི་བར་ལ་འཛིན་མེད་ཀྱི་ངང་ལ་ཆམ་མེ་བ་ནས་མཐོང༌། དེ་ནས་ཚོགས་པ་མང་པོས་ཕུན་ཚོགས་འདོད་དགུ་མ་འུར་དིང་གིས་གྱེར་བྱུང་བའི་སྐད་ཀྱིས་གཉིད་སད་ཀྱང་སེམས་བདེ་ཆམ་མེ་འདུག་གོ །ཡང་གཏུམ་ཆེན་གྱི་མངོན་དཀྱིལ་བསྒྲིག་པའི་སྒང་ལ་རྨི་ལམ་དུ་ཕ་རྡོ་རྗེ་འཆང་ཚར་པ་དང་མཇལ་ནས། གཏུམ་ཆེན་གྱི་དབང་རྫོགས་པར་གནང༌། ཤེས་རབ་ཡེ་ཤེས་བླ་མེད་སྤྱི་དང་འདྲ་བ་དང་དབང་བཞི་པའི་སྐབས་སུ་བླ་མ་རྡོ་རྗེ་འཆང་གི་རྣམ་པ་སྤྱི་བོར་གསལ་བཏབ་ནས་སློབ་མ་ལ་བསྟིམ། དེ་དང་རང་སེམས་འདྲེས་པའི་གནས་ལུགས་ལ་ངོ་སྤྲོད་མཛད། དེ་ཙམ་མ་གཏོགས་དཀྱིལ་ཆོག་སོར་བཞག་མཛད། གཏང་རག་གི་མཎྜལ་ཚུན་ཚར་ནས་བརྒྱུད་པ་ཞུས་པས་ངས་ནི་རྡོ་རིང་རིན་པོ་ཆེ་ལ་ཐོབ། དེས་མཁྱེན་རབ་རིན་པོ་ཆེ་ལ་གསན་པ་ཡིན་ནམ་གསུང༌། དེ་ནས་གཉིད་སད། ཡང་ནུབ་ཅིག་སྐུ་ནི་མ་མཐོང༌། རྗེ་བཙུན་བསོད་ནམས་དཔལ་བའི་གསུང་ཡིན་སྙམ་པའི་སྐད་གོག་གེ་བ་ཞིག་གི་གཏུམ་ཆེན་འདི་སྲིའུ་ཆུང་པའི་ཕ་ཆོས་ཐུན་མོང་མ་ཡིན་པ་ཞིག་ཡིན་ཏེ། རྣམ་པར་ཉམས་ཤིང་འཐོར་བར་གྱུར། འདི་ཁྱོད་ཀྱི་ལེགས་པར་བསོས་ཤིག །ངས་བྱིན་གྱིས་བརླབས་ཀྱི་གསུང་བ་གསལ་བར་ཐོས། ཡང་ནུབ་ཅིག་སྤྲུལ་སྐུ་དབང་ཕྱུག་རྡོ་རྗེ་ཡིན་གསུང་པའི་སྔགས་པ་ཞལ་རས་དམར་ཆམ་མེ་བ་ལ། དབུ་སྐྲ་སིལ་བུ་རིང་ཤག་དཀར་པོ་དང་ལྕམ་སྨུག་སྡུད་མ་བཞེས་པ་ཞིག་དང་མཇལ་ནས་ཞིབ་རྒྱས་མང་དུ་གསུངས། གཏུམ་ཆེན་ལ་གནང་བ་རྒྱས་པར་མཛད་པ་