[A:༥༤༡]ཞིག་བྱུང་བ་རང་དོན་མེད་པར་བསྟན་པར་བསམ་པའི་བྱིན་རླབས་ཡིན་ནམ་སྙམ། རིན་པོ་ཆེ་རོང་པའི་དྲུང་དུ་འཇོམས་བྱེད་ཀྱི་དབང་ཞུས་པའི་དུས། རྡུལ་ཚོན་གྱི་དཀྱིལ་འཁོར་གྱི་དབུས་ན་བཅོམ་ལྡན་འདས་འཇོམས་བྱེད་འབར་བ་སྐུ་མདོག་མུ་མེན་དྭངས་པའི་མདོག་ལྟ་བུ་རྩ་ཞལ་ཁྲག་སྐམ་པ་འདྲ་བའི་སྨུག་པོ་ཞལ་གསུམ་ཕྱག་དྲུག་ཕྱག་མཚན་སོགས་གམ་ལ་ཆེར་མ་ཟིན། སྐུ་ཁྲུ་གང་ཙམ་གསལ་ཞིང་དྭངས་ལ་རྙོག་པ་མེད་པ་ཞིག །མིག་ཕྱེ་བ་ནས་བཟུང་སྟེ། བུམ་དབང་མ་རྫོགས་པར་མིག་ཕྱེ་བཙུམ་མེད་པར་དངོས་སུ་གསལ་ལེར་མཐོང༌། དེ་དུས་སྐུ་དང་རྩ་ཞལ་ཁ་དོག་སོ་སོ་བ་དེ་གང་ཡིན་ནམ་སྙམ་མོད། དེ་ནས་ཡུན་རིང་པོ་སོང་ནས་ལྕེ་བློ་ལྡན་སེང་གེའི་ཐུགས་དམ་བྲིས་སྐུ་མཐོང་བ་ལའང་ཁ་དོག་དེ་ག་འདུག་ཅིང༌། འཕྲིན་ལས་ཀྱི་ཚིག་གི་གོ་བ་མྱངས་ན་དེ་ཁོ་ན་དགོས་རྒྱུར་འདུག་པས་ཡིད་ཆེས་རྙེད། རྗེ་བཙུན་རོང་པའི་ཞབས་དེ་ལྕེའི་གདུང་འཁྲུལ་མེད་སྤྱིར་བྱིན་རླབས་ཆེ་ཞིང༌། སྒོས་ལྷ་འདི་ལ་མངའ་བརྙེས་པས་དེ་ཁོ་ནའི་བྱིན་རླབས་སུ་གདའའོ། །ཕྱི་ལོ་མྱུག་ཆོས་སྡེའི་འདུ་ཁང་དུ་མངའ་རིས་རིགས་འཛིན་ཆེན་པོའི་ཕྱག་ཕྱི་བྱས་བཀའ་བརྒྱད་གསང་བ་ཡོངས་རྫོགས་ཀྱི་སྒྲུབ་ཆེན་མཛད་དུས་ཉིན་གཅིག་སྐོར་བ་བྱེད་འཕྲོ་ལ་ངལ་ནས་སྙེལ་བྱས་བསྡད་པས། གཉིད་དུ་ཧྲིབ་ཙམ་སོང་བ་ན་རིགས་འཛིན་ཆེན་པོ། ཕེབས་ནས་ཨྱོན་པདྨའི་བཀའ་ལུང་ལ་ཚེ་ཆུ་འདི་ཁོལ་ཞིང་འདུག་པས་དངོས་གྲུབ་ལེན་རན་གསུང་གི་འདུག །ད་ལྟ་ཚེ་དབང་བྱེད་གསུང་མ་ཐག་གཉིད་སད། སྐོར་བ་ལ་ཕྱིན་པས་མཆོད་དཔོན་བྱོན་ནས་དེ་རིང་བཀའ་དབང་ཞིག་ཡོད་པས་ཞལ་ངོ་ཚོ་གདན་འདྲེན་