[A:༥༤༢]ཐོང་གསུང༌། དེ་འཕྲལ་བཀའ་བརྒྱད་བདེ་གཤེགས་འདུས་པའི་ཞི་བའི་ཚེ་དབང་གནང་བྱུང་ངོ༌། །ཡང་སྒྲུབ་དབང་ཆེན་མོའི་ཆུ་དབང་གི་སྐབས་སུ་ཕ་རིགས་འཛིན་ཆེན་པོས་བུམ་པ་ཐོགས་ནས་འདུར་དབྱངས་དང་བཅས། བུམ་པ་མགོ་ལ་བཞག་པའི་ཚེ་ལུས་སྦྲིད་ཅིང་ཤེས་པ་ཀྱི་བུན་པའི་ཟིལ་ཆེན་པོ་ཞིག་བྱུང་སྐབས། ལྷོ་ནུབ་ཀྱི་ནམ་མཁའ་ན་ཚུར་གུ་རུ་ཆོས་ཀྱི་དབང་ཕྱུག་སྔགས་པ་སྒང་ཡོལ་དབུ་སྐྲའི་ཐོར་ཅོག་དར་དམར་པོས་བཅིངས་པ། སྐུ་ཤག་ཤམ་ཐབས་དཀར་པོའི་སྟེང་ན་ཚེམ་གེ་སྔོ་སང་བཞེས་པ་མགུལ་ལ་མེ་ལོང་འོད་ལམ་མེ་བཏགས་པ་ཞིག་ཕྱག་ན་བུམ་པ་ཐོགས་ཏེ། འཛུམ་ཡེ་རེ་རེ་བྱོན་བྱུང་ནས་བུམ་པའི་སྤྱི་བོར་བཞག །ངའི་ལོ་ཚད་ཀྱི་སྟེང་དུ་ལོ་བརྒྱད་བསྣན་པའི་ཚེ་ཐུབ་པར་འགྱུར། མི་ཉམས་པའི་སླད་དང་སེམས་ཅན་མང་པོའི་དོན་ལ་ལོ་རེ་བཞིན་འདི་ལྟ་བུའི་སྒྲུབ་པ་ཆེན་པོ་མ་ཆག་པ་གྱིས་ཤིག་གསུངས་ནས་འོད་དུ་ཡལ་སོང༌། རེ་ཞིག་རྟོག་མེད་དུ་ཆམ་མེ་ལུས་འདུག །སད་པ་ན་མཆི་མ་བུན་པ་ཞིག་བྱུང༌། འདི་ནས་བཟུང་སྟེ་ནམ་གསོལ་བ་བཏབ་རེས་ཀྱིས་ཉམས་ཀྱི་སྣང་བ་ལ་མཇལ་བྱུང་བ་ཡང་ཕ་རིགས་འཛིན་ཆེན་པོ་ཁོ་ནའི་ཐུགས་རྗེར་གདའོ། །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུཾ། ཕག་ལོ་ཟབ་ལུང་དུ་སྐུ་འདྲའི་སྒོ་དྲུང་དུ་ཞག་བདུན་མཚམས་བྱས་ནས་བླ་མ་བཀའ་འདུས་ཀྱི་སྤྱིའི་བསྙེན་པར་བྱས་པའི་དུས། དེ་བར་ལ་ནི་རྨི་ལམ་བརྡ་འདྲ་མོ་ཚེ་འདིའི་ལེགས་ཉེས་སྟོན་པ་ཤས་ཆེ་བར་བྱུང༌། ཟབ་ལུང་ནས་ལམ་ཞག་གཉིས་བྱས་གཡང་དུ་བསྡད་པའི་ཐོ་རངས་མདུན་གྱི་ནམ་མཁའ་ལ་ཨྱོན་རིན་པོ་ཆེའི་སྐུ་བྱིས་པ་ལོ་བརྒྱད་པའི་ཚོད་ཙམ་སྐུ་མདོག་མི་ཤ་ཁ་དམར་མདངས་ཆེ་བ། སྤྱན་གཉིས་ཤིན་ཏུ་ཟླུམ་པ་ཧ་རེ་གཟིགས་