[A:༥༤༩]མཚོའི་རིགས་བདག་རྡོ་རྗེ་འཆང༌། །ངུར་སྨྲིག་ཟོལ་གྱིས་རོལ་པའི་བཀའ་དྲིན་ཅན། །མགོན་པོ་ཁྱོད་ལ་གསོལ་བ་བཏབ་པའི་དགེ །མ་གྱུར་མཁའ་མཉམ་འགྲོ་བའི་དོན་དུ་བསྔོ། །སྐྱབས་ཆེན་བླ་མ་རྣམས་ཀྱི་བྱིན་རླབས་དང༌། །གསང་ཆེན་རྒྱུད་སྡེ་ཟབ་མོའི་བདེན་ཚིག་དང༌། །མཐུ་ཆེན་མཁའ་འགྲོ་སྲུང་མའི་མཐུ་སྟོབས་ཀྱིས། །རླབས་ཆེན་སྨོན་ལམ་འགྲུབ་པའི་བཀྲ་ཤིས་ཤོག །ཤུ་བྷ་མསྟུ་སརྦ་ཛ་ག་ཏཾ། འདི་ན་སྔོན་མེད་གསང་བའི་གཏམ། །མཁའ་འགྲོ་དཔའ་བོའི་ཕྱག་སོར་རྩེར། །བཞུགས་ནས་སྣོད་ལྡན་བུ་ལ་བྱིན། །སྐལ་མིན་རྣ་བར་ས་མ་ཡ། །ཞེས་བཀའ་རྒྱས་ཀྱང་བཏབ་བོ། །ས་མཱ་ཡ་གུ་ཧྱ། རྡོ་རྗེ་འཆང་དབང་རྗེ་བཙུན་མཁྱེན་བརྩེའི་ཞབས། །བཀའ་དྲིན་མཚུངས་མེད་དྲན་མཆོག་བསླབ་གསུམ་རྗེ། །ཡབ་སྲས་ཞབས་རྡུལ་མཆོད་པའི་སྐལ་བཟང་ཅན། །ཐུགས་ཡིད་གཅིག་ཕྱུང་གང་དེས་སྦྱར་བ་དགེ །དཔེ་འདི་ཕ་བླ་མས་བདག་ལ་དགྱེས་བཞིན་དུ་གནང་བ་བྱིན་རླབས་ཆེའོ། །ཞེས་པའོ། །དབྱར་གྱི་ཆར་སྤྲིན་སྔོན་པོར་འཁྲིགས་པའི་རུམ། །གཡུ་འབྲུག་མགྲིན་རྔ་ཤུགས་ཀྱིས་སྒྲོག་བྱེད་ན། །དམ་པའི་རང་བཞིན་རྨད་དུ་བྱུང་བའི་གཏམ། །དངོས་པོའི་གཤིས་ལ་མཚར་འཛིན་བྱིས་པའི་བློ། །འཇམ་མགོན་བྱིན་རླབས་ཉ་གང་འོད་དཀར་ནས། །མཁས་གྲུབ་ག་བུར་གཟེགས་མས་སྒྲིབ་གཉིས་ཀྱི། །གདུང་སེལ་སྒྱུ་འཕྲུལ་ལྷ་ལམ་མཐའ་རྙེད་ན། །ཡོན་ཏན་འདི་ཙམ་རྡུལ་གྱི་ཆ་ལས་ཕྲ། །གང་ཐུགས་