[A:༥༥༢]གཉིས་འཁྲུངས་པའི་གཅེན་དམ་པ་འདི་ཉིད་ལྷུམས་སུ་མ་ཞུགས་པའི་སྔོན་དུ་ཡུམ་གྱི་མནལ་ལམ་དུ་རྡོར་འཛོམ་ཟེར་བའི་ཞིང་གི་ཚིགས་ནས་ཀྲོང་ཆུང་དུང་གི་གང་བ་རྙེད་ཁྲོད་ནས་ལྕམ་གྱི་ཨ་ཇོས་དུང་དཀར་གཡས་འཁྱིལ་ལེགས་པོ་ཞིག་ཚེ་དབང་བསོད་ནམས་དཔལ་རང་གྱིས་ཞེས་གཏད་པ་སྐུ་ཕག་ཏུ་བཅུག་པ་རྨིས། ལྷུམས་སུ་ཞུགས་པའི་ཚེ་སྲིད་པ་འཁོར་བའི་ངང་ཚུལ་མཐའ་དག་མེ་འབར་བའི་རླུབས་ལྟར་སྡུག་བསྔལ་གྱི་རང་བཞིན་ཅན་ལྷ་མིའི་དབང་ཕྱུག་རྣམས་ཀྱང་ཟག་བཅས་ཀྱི་བདེ་བར་འགྱུར་བའི་སྡུག་བསྔལ་ཡིད་བརྟན་མི་རུང་བའི་ཆོས་ཅན་དང༌། ཚུལ་དེས་དྲངས་ནས་རང་ཉིད་གཅིག་པུར་མ་ཟད་ཁམས་གསུམ་གྱི་སེམས་ཅན་ཐམས་ཅད་སྡུག་བསྔལ་གསུམ་ཅི་རིགས་ཀྱིས་མནར་བར་མི་བཟོད་པའི་སྙིང་རྗེ་དང་སྐྱོ་ཤས་ངེས་འབྱུང་བཅོས་མ་མ་ཡིན་པ་དང༌། སྡུག་བསྔལ་དེ་དག་ལས་ཐར་པའི་སྐྱབས་གནས་དཀོན་མཆོག་རིན་པོ་ཆེ་རྣམ་པ་གསུམ་ཡིན་པར་རྒྱུ་མཚན་ཤེས་ནས་མི་འཕྲོག་པའི་དད་པ་བརྟན་པོ་གོང་དུ་འཕེལ་བ་སོགས་ཡུམ་གྱི་ཐུགས་ལ་འགྱུར་བ་སྔར་དང་མི་འདྲ་བ་འཁྲུངས་པར་བརྟེན་ནས་དེ་དག་ཀ་མད་སུམ་ཅུར་གྲས་པའི་ཚིགས་བཅད་ཀྱང་མཛད། མནལ་ལམ་དུ་བྲག་མཐོན་པོ་ཞིག་གི་རྩེར་ཐམས་ཅད་མཁྱེན་པ་མཁྱེན་བརྩེའི་དབང་ཕྱུག་ཕྱག་ན་བུམ་པ་བསྣམས་ཏེ་བཞུགས་པའི་བྲག་རྩར་ཡུམ་ཉིད་འཁོད་པའི་དབུ་གཙུག་ནས་བུམ་ཆུ་སྐྱ་ནར་གྱི་བླུག་པས་ལུས་སེམས་བདེ་བས་ཁྱབ་པའི་ཉམས་ཤར། དེ་ཡང་སྐུ་བལྟམས་པའི་ཡུལ་ནི། ཁྲུས་ཁང་ལོ་ཙཱ་