[A:༥༦༡] དེ་ནས་སྡེ་པ་བཀྲ་ཤིས་རྩེ་བ་དང་ཆོས་སྡེ་པ་ཡོན་མཆོད་ནས་གདན་འདྲེན་བྱུང་བ་ལྟར་ཡབ་སྲས་ཆབས་ཅིག་པར་ཆིབས་ཁ་བསྐྱོད། བྱམས་ཆེན་དུ་རྗེ་བཙུན་ཞ་ལུ་བ་ཆེན་པོ་དང་ཐོག་མར་མཇལ། དེ་ནས་དབུས་འགྱུར་གྱི་ལྟེ་བ་ཡར་ཀླུངས་སྐྱིད་པའི་སྨན་ལྗོངས་སུ་ཕེབས། རྗེ་བཙུན་ས་སྐྱ་པའི་གསང་ཆེན་སློབ་བཤད་ཀྱི་སྔགས་གྲ་བཀྲ་ཤིས་རྩེ་ཆོས་སྡེར་སྟན་ཆགས། ལོ་ཤས་བཞུགས་རིང་རྗེ་རྡོ་རྗེ་འཆང་ཆེན་པོས་གཉུག་མར་གནས་པ་དང་ཕྱོགས་འདུས་ཀྱི་དམ་པའི་ཆོས་དོན་དུ་གཉེར་བ་ཆུའི་རླབས་འཕྲེང་བཞིན་ཡོལ་བ་མེད་པ་རྣམས་ལ་ཆོས་ཀྱི་འཁོར་ལོ་བསྐོར་བའི་ཞར་ཆོས་དང༌། སྙིང་པོ་ཀྱེ་རྡོ་རྗེ་མན་ངག་ལུགས། འཇིགས་མཛད་རྡོ་རྗེ་སོགས་དཀྱིལ་འཁོར་དུ་མའི་དབང་བཞི། མཁའ་སྤྱོད་སྐོར་གསུམ། དམར་པོ་སྐོར་གསུམ། ཆོས་སྐྱོང་ཆེ་ཆུང་ནས་ཉེར་མཁོའི་རིགས་དང་གཞན་ཡང་རྒྱུད་སྡེ་བཞི་དང་འབྲེལ་བའི་དབང༌། བྱིན་རླབས། རྗེས་གནང༌། ལུང་ཁྲིད་མན་ངག་མང་དུ་གསན་ཅིང་དེ་དག་ཀྱང་གསན་ལོ་ཙམ་མ་ཡིན་པར་སྐུ་ན་ཕྲ་ཡང་ཐུགས་ལ་ངེས་ཤིང་བྱང་ཆུབ་པར་མཛད། རྗེ་རྡོ་རྗེ་འཆང་གི་དགོངས་པར་སྙན་བརྒྱུད་མངའ་བདག་རིན་པོ་ཆེ་བོད་མཁར་ནས་ཀྱི་ཞལ་སློབ་སྤྱན་སྔ་མི་ཕམ་ཆོས་ཀྱི་རྒྱ་མཚོའི་གདམས་ངག་བུམ་པ་གང་བྱོར་བཞུགས་པ་ཆོས་རྗེ་རབ་འབྱམས་པ་ཀུན་དགའ་ལྷུན་གྲུབ་གདན་སར་བསྐོས་ནས་ཡབ་སྲས་གཉིས་ཀ་གཙང་དུ་ཐེགས་བཞེད་དེ་རིན་པོ་ཆེ་ཆོས་སྐུ་བ་གདན་དྲངས་ཀྱང་ཆོས་སྡེ་བ་ཚོའི་བློར་བབས་རྒྱུ་མ་བྱུང་བར་བརྟེན་ངེད་ཀྱི་ཚ་བོ་འདི་ཆོས་བཀའ་འདྲ་ཞུ་རྩིས་ཡིན་ཚུལ་ལ་བསྙད་པའི་བཀའ་