[A:༥༠༤] མ་ནུབ་དབང་གི་ཆུ་བོས་ཐུགས་རྒྱུད་སྨིན་པས་གྲོལ་བྱེད་བསྐྱེད་པ་དང་རྫོགས་པའི་རིམ་པ་ནི་ཟབ་ལམ་ལ་བརྟེན་ནས་གྲུབ་པའི་མཐའ་སྙོག་པར་ནུས་ལྡན་རིག་སྔགས་འཆང་བ་སོགས་གསང་བ་བསམ་གྱིས་མི་ཁྱབ་པའི་ཡོན་ཏན་གྱི་ཕུང་པོ་ཚངས་པ། དབང་ཕྱུག །ཁྱབ་འཇུག་སྟེ་འཇིག་རྟེན་གྱི་གཙོ་བོ་གསུམ་དང་ཉན་རང་བྱང་སེམས་སོ་སྐྱེའི་ཚོགས་ཀྱིས་གཞལ་བར་དཀའ་བ་འཕགས་པ་རྣམས་ཀྱི་ཡེ་ཤེས་ཁོ་ནའི་སྤྱོད་ཡུལ་ཉག་གཅིག་པ་བདག་འདྲའི་བློ་གྲོས་ཀྱི་ཆ་ཕྲ་བས་ལྟ་ག་ལ་ཞིག །སྐུ་ཚེའི་འཕྲེང་བ་དུ་མར་ཐུབ་བསྟན་རིན་པོ་ཆེ་གསལ་བར་བྱེད་པའི་མཁས་གྲུབ་ཀྱི་སྐྱེས་རབས་མུ་ཐི་ལའི་འཕྲེང་མཛེས་དང༌། སྐུ་ཚེ་འདིར་ཡང་ལྷ་དང་བླ་མ་མང་པོ་ཞལ་གཟིགས་ཤིང་ལུང་བསྟན་ཐོབ་པ། རྡོ་རྗེ་ཆོས་སྐྱོང་བྲན་དུ་འཁོལ་བའི་འཕྲིན་ལས་སྒྲུབ་པ། ས་ལམ་གྱི་ཡོན་ཏན་ཕུལ་དུ་བྱུང་བ་ནི། ཞུ་ལན་ནོར་བུའི་འཕྲེང་བར། བདག་གི་ཡོན་ཏན་སྦ་བྱ་ཞིང༌། །གཞན་གྱི་ཡོན་ཏན་བསྒྲག་པར་བྱ། །ཞེས་པའི་དོན་བཞིན་ཡོན་ཏན་མཐའ་དག་རྒྱ་མཚོའི་གཏིང་གི་རྡོ་བ་ལྟར་མི་མངོན་པ་གཙོ་བོར་འདོན་པས་བསྙེལ་ཐོ་དང་ཞལ་སློབ་ཀྱི་རིགས་ལ་གསུང་འཕྲོས་ཀྱི་ཟུར་ཙམ་ཡང་ཆེར་མ་གསུངས་ཤིང༌། ཁོ་བོས་གསུང་ངག་རིན་པོ་ཆེ་ཞུས་སྐབས་མདང་རྨི་ལམ་དུ་པོ་ཏ་ལའི་ལི་མ་ལྷ་ཁང་ཡིན་རྒྱུ་བལ་ཟེའུ་ལྷ་ཁང་འདྲ་རུང་བའི་གློ་སྐར་ནས་བལྟས་པས་རྗེ་བཙུན་ས་སྐྱ་པ་ཆེན་པོ་བཞུགས་འདུག་པ་ཞིག་བྱུང་བ་གསུང་ངག་རིན་པོ་ཆེ་འདིའི་འཆད་ཉན་ལ་དགྱེས་པ་འདྲ་གསུང་བ་ཞིབ་ཏུ་ཞུས་ཀྱང་དེ་ཙམ་ལས་མི་དྲན་ཞེས་ཐུགས་དཀྱིལ་ཆེ་བས་གསལ་བར་མི་མཛད་ནའང་དོན་དུ་མནལ་ལྟས་མ་ཡིན་པས་གཟིགས་