[A:504] ma nub dbang gi chu bos thugs rgyud smin pas grol byed bskyed pa dang rdzogs pa'i rim pa ni zab lam la brten nas grub pa'i mtha' snyog par nus ldan rig sngags 'chang ba sogs gsang ba bsam gyis mi khyab pa'i yon tan gyi phung po tshangs pa/ dbang phyug /khyab 'jug ste 'jig rten gyi gtso bo gsum dang nyan rang byang sems so skye'i tshogs kyis gzhal bar dka' ba 'phags pa rnams kyi ye shes kho na'i spyod yul nyag gcig pa bdag 'dra'i blo gros kyi cha phra bas lta ga la zhig /sku tshe'i 'phreng ba du mar thub bstan rin po che gsal bar byed pa'i mkhas grub kyi skyes rabs mu thi la'i 'phreng mdzes dang / sku tshe 'dir yang lha dang bla ma mang po zhal gzigs shing lung bstan thob pa/ rdo rje chos skyong bran du 'khol ba'i 'phrin las sgrub pa/ sa lam gyi yon tan phul du byung ba ni/ zhu lan nor bu'i 'phreng bar/ bdag gi yon tan sba bya zhing / /gzhan gyi yon tan bsgrag par bya/ /zhes pa'i don bzhin yon tan mtha' dag rgya mtsho'i gting gi rdo ba ltar mi mngon pa gtso bor 'don pas bsnyel tho dang zhal slob kyi rigs la gsung 'phros kyi zur tsam yang cher ma gsungs shing / kho bos gsung ngag rin po che zhus skabs mdang rmi lam du po ta la'i li ma lha khang yin rgyu bal ze'u lha khang 'dra rung ba'i glo skar nas bltas pas rje btsun sa skya pa chen po bzhugs 'dug pa zhig byung ba gsung ngag rin po che 'di'i 'chad nyan la dgyes pa 'dra gsung ba zhib tu zhus kyang de tsam las mi dran zhes thugs dkyil che bas gsal bar mi mdzad na'ang don du mnal ltas ma yin pas gzigs