[A:༥༧༢]ཐོག་ཚད་མ་སྐྱ་རིས་གྲུབ་ཅིང་ཚོན་འགོ་ཚུགས་ཙམ་ལ་ལུས་པར་ཁ་སྐོང་ཅུང་ཟད་དང་བཅས་གྲངས་སུམ་ཅུ་ཐམ་པ་གོང་གཤམ་ཞལ་ཁེབས་ཏོག་ལྡན་ལེགས་པར་བསྒྲུབས་པར་ཀྱེ་རྡོ་རྗེའི་དཀྱིལ་འཁོར་ལ་བརྟེན་ནས་རབ་ཏུ་གནས་པ་རྒྱས་པར་གནང་དེ་ནས་གསུང་ངག་བརྒྱུད་པའི་ཞལ་ཐང་གྲ་ཚང་བསྣམས་ཏེ་གཙང་དུ་ཐེགས་པའི་ལམ་ནས་ངོར་དུ་མཁན་ཆེན་དཔལ་ལྡན་དོན་གྲུབ། བྲང་ཏི་པ་ནམ་མཁའ་སངས་རྒྱས། ཤར་པ་ཤེས་རབ་འབྱུང་གནས་གསུམ་དང་མཇལ་ཞིང་བྲིས་ཐང་ལ་ཕྱག་ནས་ཞུ་བ་མཛད། རིམ་གྱིས་འདར་སྟོད་བླ་མའི་གདན་སར་ཕེབས། རྗེ་རྡོ་རྗེ་འཆང་ལ་ཕྱི་ནང་ཕྱག་རྫས་ཡོད་དགུ་ལྟ་བུའི་འབུལ་ཆེན་དང་བཅས་གསུང་ངག་བརྒྱུད་པར་དམ་ཚིག་པ་ལ་ཡེ་ཤེས་པ་འཇུག་པའི་ཕྱག་ནས་ཞུས། དེ་ནས་བདག་ཚེ་དང་སྒྲུབ་པ་མཉམ་པའི་བུག་སྒོ་འདམ་སྦྱར་བྱས་ཆོག་པའི་གསོལ་བ་བཏབ་པར། ཁྱོད་ཀྱིས་སྒོམ་སྒྲུབ་གཅིག་པུ་མཛད་པས་ག་ལ་ཁྱབ། ཐོས་བསམ་འཆད་ཉན་བྱ་བ་ལས་ཀྱི་འཁོར་ལོ་སོགས་ཚང་མ་མཛད་ན་བསྟན་འགྲོའི་དོན་རྒྱ་ཆེར་འགྲུབ་ཚུལ་བསླབ་བྱ་ལུང་བསྟན་གྱི་ཚུལ་དུ་གནང་བར་བརྟེན་བླ་མ་དམ་པས་ཇི་ལྟར་བཀའ་སྩལ་པ་བཞིན་སྙིང་སྟོབས་ཀྱི་མཐུ་ཕུལ་དུ་བྱུང་བའི་དམ་བཅའ་བརྟན་པོས་དེ་ལྟར་བསྒྲུབ་པར་ཞལ་གྱིས་བཞེས་སོ། །ཐོས་བསམ་སྒོམ་པའི་ནོར་བུ་གཞོན་ནུའི་དུས། །བློ་གྲོས་གདེངས་ཀའི་རྩེ་མོར་གཟི་འབར་བས། །མཁས་བཙུན་གྲུབ་མཆོག་ཀླུ་ཡི་དབང་པོའི་གདུང༌། །རྒྱུད་སྡེའི་དགོངས་པ་ཇི་བཞིན་སྲི་ཞུར་བསྐྲུན། །རབ་མཛེས་ས་ཟླའི་འོད་འཕྲོ་མཆོད་སྡོང་ཆེ། །རབ་ཏུ་བརྩོན་པའི་མཐུ་