[A:༥༠༦]ཆེན་ཆོས་ཀྱི་རྒྱལ་པོ་ཐུབ་བསྟན་སྤྱི་དང་བྱེ་བྲག་རང་བསྟན་ཁའུ་བྲག་རྫོང་པའི་རིང་ལུགས་འཛིན་པར་སྤྲུལ་པའི་ཟློས་གར་བསྟན་པ་འདྲ་ཕེབས་པ་རྡོ་རྗེའི་གསུང་བླ་ན་མེད་པར་གོ །གཞན་དུ་བསམ་གྱིས་མི་ཁྱབ་པའི་རྟོགས་པ་བརྗོད་པའི་རྔོ་མ་ཐོགས་ནའང་སྙིགས་དུས་ཀྱི་གདུལ་བྱ་སྨིན་པ་གསུམ་ཤས་ཆུང༌། སྒྲིབ་པ་གསུམ་གྱི་བག་ཆགས་ཆེས་ཆེར་བདོ་བའི་གང་ཟག་རྣམས་ཀྱི་བློ་དང་འཚམ་པར་རྣམ་པར་ཐར་པ་རྒྱ་མཚོ་ལྟ་བུ་ལས་ཆེར་ལོང་ཙམ་དྲུང་དུ་འཁོད་པའི་རྒྱུས་ཡོད་འདྲས་ཟིན་བྲིས་སུ་བཏབ་ཅིང༌། རིགས་ཀུན་ཁྱབ་བདག་ཞ་ལུ་མཁན་ཆེན་ཀུན་སྤངས་པ་ཆེན་པོའི་སྤྱན་རས་ཀྱིས་བཙའ་བར་མཛད་དེ་ལམ་ཙམ་ཞུས་དག་པའི་སྟེང་ནས་ཅུང་ཟད་འདྲི་བ་ནི། རིན་པོ་ཆེ་སྡུད་པ་ལས། འཛམ་བུའི་གླིང་འདིར་ཆུ་ཀླུང་ཇི་སྙེད་ཅིག་འབབ་ཅིང༌། །མེ་ཏོག་འབྲས་ལྡན་སྨན་དང་ནགས་ཚལ་སྐྱེད་བྱེད་པ། །མ་དྲོས་གནས་པའི་ཀླུ་དབང་ཀླུ་བདག་བརྟེན་གནས་ཏེ། །དེ་ནི་ཀླུ་ཡི་བདག་པོ་དེ་ཡི་མཐུ་དཔལ་ཡིན། །རྒྱལ་བའི་ཉན་ཐོས་པ་དག་ཇི་སྙེད་ཆོས་སྟོན་དང༌། །འཆད་དང་རིག་པ་དག་དང་ལྡན་པར་བརྗོད་པ་དང༌། །མཆོག་འཕགས་བདེ་བ་བྱེད་དང་དེ་ཡི་འབྲས་ཐོབ་པ། །དེ་དག་ཀུན་ཀྱང་དེ་བཞིན་གཤེགས་པའི་སྐྱེས་བུའི་མཐུ། །ཞེས་འཛམ་བུའི་གླིང་གི་ཆུ་ཀླུང་སྨན་དང་ནགས་ཚལ་སོགས་ཀླུའི་རྒྱལ་པོའི་མཐུ་ལས་བྱུང་བ་བཞིན་ཐུབ་པའི་རྗེས་འཇུག་གི་ཚོགས་ཐོས་བསམ་སྒོམ་པའི་མཐུ་ལ་བརྟེན་ནས་འབྲས་བུ་ཐོབ་པ་རྣམས་དེ་བཞིན་གཤེགས་པའི་ཐུགས་རྗེ་ལས་བྱུང་བར་གསུངས་པ་སྤྱིར་སངས་རྒྱས་འཇིག་རྟེན་དུ་མི་འབྱོན་པའི་ཚེ་མུན་བསྐལ་དང་བྱུང་བའི་