[A:༥༠༧]དུས་སྒྲོན་བསྐལ་དུ་བཤད་པས་བསྐལ་པ་བཟང་པོ་འདི་ལ་སངས་རྒྱས་སྟོང་འབྱུང་བར་གསུངས་པའི་འོ་སྐོལ་གྱི་སྟོན་པ་ཤཱཀྱ་སེང་གེའི་ལུང་རྟོགས་ཀྱི་བསྟན་པ་ཡུལ་དབུས་འགྱུར་འཆད་དུ་དར་རྒྱས་སུ་གྱུར་པ་ནས་ཡུན་རིང་ཞིག་ནས་བོད་དུ་དམ་པའི་ཆོས་འབྱུང་བར་ལྷ་མོ་དྲི་མ་མེད་པས་ཞུས་པའི་མདོ་ལས། ང་ཡོངས་སུ་མྱ་ངན་ལས་འདས་ནས་ལོ་ཉིས་སྟོང་ལྔ་བརྒྱ་ན་གདོང་དམར་ཅན་གྱི་ཡུལ་དུ་དམ་པའི་ཆོས་དར་བ་འགྱུར་རོ། །ཞེས་སཱ་ལའི་ནགས་ཀྱི་སྨན་ལྗོངས་རི་ཁ་བ་ཅན་གྱི་ཁྲོད་དུ་རྒྱལ་བའི་བསྟན་པ་བྱུང་བའང་སྤྱིར་འགྲོ་བ་མིའི་བྱུང་ཚུལ་ལྷ་ལས་ཕུལ་བྱུང་གི་བསྟོད་འགྲེལ་དུ། སྐྱ་སེང་བུ་ལྔ་དང་དགྲ་ངན་དཔུང་ཚོགས་བཅུ་གཉིས་འཐབས་པའི་དུས་སུ་རྒྱལ་པོ་རཱུ་པ་ཏི་ཞེས་པ་དམག་སྟོང་ཕྲག་གཅིག་དང་བཅས་པ་བུད་མེད་ཀྱི་ཆས་སུ་ཞུགས་ཏེ། རི་གངས་ཅན་གྱི་གསེབ་ཏུ་བྲོས་པ་ལས་འཕེལ་ཚུལ་བྱུང་ཞིང་རྒྱལ་པོ་བཀའ་འབུམ་སོགས་ཐུགས་རྗེ་ཆེན་པོའི་ཆོས་སྐོར་རྣམས་སུ་སྤྱན་རས་གཟིགས་དང་སྒྲོལ་མའི་སྤྲུལ་པ་སྤྲེའུ་དང་བྲག་སྲིན་མོ་འདུས་པ་ལས་འཕེལ་བར་བཤད་པ་གདོང་དམར་ཤ་ཟན་གྱི་ཕྲུག་གུ་ཤིན་ཏུ་གདུལ་བར་དཀའ་བར་ཆོས་ལ་བློ་མི་འཇུག་པ་རྣམས་བཀའ་གདམས་གླེགས་བམ་རིན་པོ་ཆེར། བོད་ནི་རྒྱལ་པོ་དག་ལ་ཚད་མར་འཛིན། །མི་དབང་མཛོད་ལ་བོད་ཁམས་བདེ་བར་སྐྱོངས། །ཞེས་ཐོག་མར་འབངས་མཐའ་དག་རྒྱལ་པོ་ཆེན་པོ་ཞིག་གི་མངའ་འོག་ཏུ་བསྡུས་ཏེ་རིམ་གྱིས་སངས་རྒྱས་ཀྱི་འཕྲིན་ལས་འབྱུང་བར་མཁྱེན་ནས་བོད་སྤྱིའི་རྒྱལ་པོ་ལ་སྔ་བ་རྗེ་གཉའ་ཁྲི་བཙན་པོ་ནས་རྒྱལ་རབས་རིམ་པར་བྱུང་ལ།