de 'jam dbyangs mkhyen brtse'i dbang phyug gi gsung 'bum gsar bsgrigs kyi glegs bam gsum dang rdo rje 'chang dbang phyug rab brtan gyi bka' 'bum pusta kaHgcig rnams bstan pa rin po che'i btsas su dgongs te bla ma gong ma rnams kyi bka' bsdu'i tshul du legs par bsgrub par gnang ngo / /zhing mang skal ldan don la dgyes pa'i zhal/ /'dzum pa'i gzugs brnyan sdud la nyer gzhol tshe/ /gsol ba'i re skongs 'ja' lus rdo rje'i sku/ /grub de lhar bcas 'gro la ston pa bzhin/ /spur rgyal bde 'phrog chom rkun du ruShka/ /sde dpung mngon spyod las kyis phyer btags nas/ /rnam shes mi bskyod zhing du rab 'phangs pas/ /kun la brtse yang khyad par khyod kyi gnyen/ /rtag brtan g.yung drung chos sku mngon gyur kyang / /rtag 'dzin srid zhen 'ching rgya las grol ched/ /rtag min zhing 'dir mdzad pa'i mtha' btul yang / /rtag tu phyogs 'di'i bstan 'gror gcig tu brtse/ /'chi ba 'od gsal don gyi he badzra/ /so sor snang ba'i cho 'phrul tha mi dad/ /'og min zhing khams zhing gi gtsor gshegs pa/ /ngo mtshar mchod sprin spro la lha rnams brel/ /grangs med 'gro 'dren sems bskyed dam bca'i khur/ /nam yang gtong ba'i go skabs mi srid mod/ /thugs rje bskul ba'i legs byas phung po ru/ /song na snod du 'jig rten khams 'di chungs/ /'on te bstan srung bye ba'i 'khor los sgyur/ /byin rlabs mdzod spu'i thigs phreng gzugs can du/ /grub tshe bdud rtsi'i bum pa chu gter nas/ /len pa'i lha rnams bya dka'i 'bras bur zad/ /snga 'gyur bstan pa'i bdag por mkhyen brtse dang / /nus pas dbang sgyur sngags 'chang byang pa rje/ /nyi zla 'od zer sprul par chos rjes su/ /'brangs te rigs kyi bdag por thod du bcings/ /mkhas grub gzhan gyi spyod yul ma gyur pa/ /sa skya'i bla chen kho na'i khyad par chos/ /lam zab bka' babs brgyud pa nor bu'i 'phreng / /ngo mtshar bkod pa'i srad bur gcig tu brgyus/ /rnam kun mchog ldan stong chen phyag rgya che/ /e waM zung 'jug dang po'i sangs rgyas kyi/ /'khor lo'i mgon du bzhengs pa'i rdo rje'i 'gros/ /tshangs pa'i yul sa sor mo'i rdul gyis gnon/ /dus gsum 'dren pa gsung gi yang snying dpyid/ /brjod pa rnam dag ka 'phreng glegs bam du/ /legs bsdus srid mthar rma med bstan pa'i srog /btsugs pas 'od srungs bgres po'i snyan pa phrogs/ /re zhig gdan sar stan chags mur gnyug mar gnas pa dang phyogs 'dus kyi gdul bya rnams la khams dang dbang por 'tsham par rgyud sde rnam bzhi'i dbang khrid rjes gnang rig gtad lung blo sbyong ba'i rim pa sogs theg chen thun mong ba dang khyim pa dang rab tu byung ba rnams so so'i rigs kyi bslab pa la 'god pas mtshon rnam par dkar ba'i 'phrin las dbyar mtsho ltar 'phel na'ang don med zang zing gi 'du 'khod kyi dbang du nam yang mi 'gro bar mtshan bcas mtshan med kyi nyams bzhes dus gtor sogs thugs dam zab mo'i rim pa bla nas blar 'phel bzhin pa'i ngang nas bka' chos mang du gsan par ma zad sngar sa stag dang zha lu'i lo gsum ma'i rjes thugs rtsol gnang ba 'ga' zhig phyogs gcig tu bkod par/ kun mkhyen ye bzang rtse pas/ de ltar 'dul ba'i bstan par 'phel 'grib cher byung mod kyi theg pa chen po gsang sngags ni deng sang gi bar nub ma myong zhes