bla ma sku gsum gyi sgrub pa/ padma lam zab kyi gu ru khro bo rigs gsum gyi dbang lung / tshe dpag med rdzong chen ma'i tshe dbang / rdzogs chen sangs rgyas mnyam sbyor gyi chos skor/ thugs rje chen po yang snying 'dus pa'i dbang lung / rta mgrin nag po'i dbang lung / bla ma gsang 'dus kyi cha rkyen padma bcud bsdus kyi chos skor don tshan bcu gnyis pa/ dpal mgon ma ning gi chos skor/ mnga' ris paN chen padma dbang rgyal gyi padma snying tig gi chos skor/ rdzogs pa chen po kun bzang snying tig gi chos skor/ rdzogs pa chen po'i rgyud bcu bdun sogs kyis mtshon pa'i zab chos mang du gsan/ gangs can gyi ljongs 'dir bstan pa dbu bsnyengs pa'i gnas chen pho brang yum bu bla mkhar mjal bar phebs te/ chos rgyal tho tho ri snyan shal gyi mkhar byin rlabs can der bstan pa rgyas pa'i phyag mchod smon lam mdzad zhol der tshal dus bzhengs pa'i gyang logs shig la mgon po gur gyi bal bris rnying pa byin rlabs can zhig yod par 'di babs chags shing zil che zhes snyan shal sgron pa'i tshe de 'phral zhal nas bdud rtsi zil pa khrom khrom byung ba'i shul da lta yang yod/ de'i shar phyogs kyi bang so der gter mang po yod pa 'dra zhes gzigs rtog gnang bas gyang hrab tsam brkos shul gyi steng na g.yam pa'i gnam sgo zhig 'dug par phyag reg pas khrol khrol byed par 'di rdo gas na gter yod nges rung re zhig gzhog gsungs pa zham 'bring pa sogs der yod thams cad kyis nges shes su gyur na'ang rjes su bltas pas shul tsam yang ma byung snang / bstan pa spyi sgos kyi ched du 'jigs byed drug cu pa'i gtor bzlog gnang / skabs shig gzims chung gi nang sha chen gyi gsur dud chen pos khengs pa bka' las khyod tshos sha bsregs pa'i dris nga'i gre ba 'gags gsungs par mchod dpon gyi nged tsho'i khrod na bsreg mkhan med gzims chung nang rang nas dri ma byung zhus pas cang mi gsung / de nub bla brang thog nas gtor ma 'phen pa gnang bas sman lung gi mda' na chos sde la shin tu brnag pa'i ma rungs pa zhig yod pa de srod 'khor la grir gum/ bla brang gi rgyab tu sngar nas btsan zhig yod pa gtor zor babs pa dpal ldan dus kyi dgra bo'i gzi byin ma bzod par sne mo khang gsar gyi rgya lam mkhar spos pa da lta'ang yod do/ /chags bral tshangs par spyod kyang 'dod yon kun/ /lam byed rdo rje gdan mtshungs chos kyi sder/ /thub bstan dgongs pa gcig pa'i 'gal med gar/ /bsgyur tshe klu sgrub snying po gzugs gzhan bzung / /dpal ldan chos kyi 'byor pa gling yangs por/ /khu ston smra la ngag gi dbang phyug pa/ /rnam dpyod yid bzhin rgyal mtshan rtser bkod las/ /sde bzhi'i lung gi 'dod rgu char du bsnyil/ /tshul ldan khrims gnas mkhyen pa'i lha lam ngos/ /smin grol gzhung bshad 'ja' tshon rab bkra ba/ /shis brjod glu yi nyi mas yongs khyab pa'i/ /gling 'dir nges gsang bstan pa'i bdag por bskos/ /gzhom med blo mchog yangs pa rdo rje'i khams/ /rnam dpyod g.yas 'khyil mgrin las legs bshad sgra/ /'dren pa'i snyan gyi dbang por ches dngar bas/ /dbyangs bdun tshang ba'i glu la yi rang bcad/ /chos brgyad tsha zer spangs pa'i rta ldan snar/ /kun bzang chos kyi sa bon yongs zhugs 'bras/ /'od gsal snang bzhi'i lus rdzogs