rigs gsum yaksha bla 'og /gling bzhi/ gling phran/ jo mo'i gling gsum dang bcas pa'i rten brten pa rnams la dkar me snyan shal sogs kyi tshogs gsog /bshad sgrub kyi ring lugs/ skye rgu'i legs byas 'phel ba'i smon lam gyis mtshams sbyar ba'i dus mkhan tshang ba dang rab byung ba rnams kyis zhabs drung sgar chen zhing khams gzhan du gshegs nas lcog tu rang lugs kyi bla ma phebs mkhan gzhan ma byung gshis da lam chos skyong chen po sku phebs dang 'grig pas ngos mjal 'gab zhus rung snyan dar dang dmod nas tsam phul bas 'thus rtsis la smon grong gi dre'u g.yar po bcad 'bangs pa'i mdzos brdungs pa ma mjal na 'khren pa'i brdar dgongs te lcog la phebs pa dregs pa yongs kyi sde dpon gnod sbyin tsi'u dmar po khog tu brlams pa rdo skyags mgor bsu bar phebs nas khrom pa rnams lha rgyal lan gsum then bcug cing dgyes pa'i rnam 'gyur mdzad/ sde pa stag rtse bas dung chen gsar brdungs spyan 'bebs zhus pa da res mkhan po byon pa dang 'grig pa rten 'brel gyi sgo yod pas phyogs bzhi nas 'bud du bcug pa/ ji skad du/ sngon gyi rgyal po grags pa'i gzugs/ /ngag gi rang bzhin me long thob/ /de nyid nye bar mi gnas kyang / /rang nyid nyams pa med la ltos/ /zhes pa ltar rje bla ma dag zhing du gshegs nas lo bco brgyad tsam slebs kyang sku gsung thugs kyi rnam par thar pa'i grags snyan phyogs bral gyi rna ba'i rgyan du je cher 'phel ba'i brdar mngon/ sngon dge slong nag po sogs kyi skye rgyus bha ta hor gyi sgom gra nas byon te gu ru padmas gtsug lag khang gi srung mar bskos pa nas da bar ma nyams par mdzad lugs kyi rgyu mtshan rgyas par gsungs pa'i tshe rje nyid kyis shin tu legs tshul dang dge rgyas 'di bye ma'i gnod pas 'jig par nye ba chos skyong chen po'i rdzu 'phrul gyis zhi ba byung na zhes zhus pa'i lan du spyir 'gro ba'i las gtso zhing sgos su gzugs can gyi mis ma byas na nged gzugs med kyis dka' gsung / dmod nas dang bcas bstan 'gro'i phan bde sgrub pa'i 'phrin bcol dang 'gro ba rnams kyang mi dge bar spyod pa shas che bas mi lus thob pa'ang dka' mor mchis pa zhing bcu tshang ba'i rigs ma gtogs skye 'gro'i srog dbugs la gnod pa mdzad na mi legs tshul zhu ba gnang bar sangs rgyas kyi bstan pa srung ba'i bya ra byed cing bstan 'gro'i bde skyid 'phrog pa'i dgra bgegs ni sngar yang tshar bcad da rung gu ru padma'i bka' las mi 'da' de min sdug 'dres sems can tshor gnod pa ga la byed/ 'gro ba rnams kyis sdig pa mi dge ba bsags pa'i 'bras bu sdug 'dre'i rnam pa shar ba yin pas bya thabs ga la yod gsungs par rjes su'ang thugs nges shes 'drongs par snang / sngar khyed kyis mdzad zer rgyu min kyang sdug 'drer dmigs pa'i srung mdud mangs na bar chad kyi rgyur 'gro bas mi 'gab tshul gsung ba'i shugs bstan ched du dmigs nas bskyed chog mdzad pa re gnyis la sngon rje btsun rdo ring pa chen por gnas rnying rgyal pos khas blangs pa dang 'dra bar sems shing slar sku rim sogs blang dor gyi lung bstan zhib tu mdzad/ rdo skyags mgo'i bar phebs skyel zhus shing mchod rten dmar po ba'i btsun pas stag lung zhabs drung phebs pa las 'tshub pa dang da res las 'jam pa ma dran zer ba ni/ rje