/mkhas grub chad med gdung byon rngog pa'i zhabs/ /dpa' bo'i grong du zhugs tshe rags pa'i pur/ /sri zhu bskrun pa'i bzhugs gnas mchod sdong che/ /rab bzhengs chos sku'i klong du thugs dgongs rdzogs/ /de nas bkra shis chos kyi 'dus pa'i gling chen por phebs nas sa khyim rdzogs par stan chags/ de yang rnam thar gyi sa bon la lo tshigs zhib cha yod med sna tshogs dang yod pa la'ang snang la ma nges kyi dpyad mi bzod pa 'ga' mthong na'ang bla ma rags rim gong smos ltar yin la/ zhib tu ma 'tshal bar phyogs gcig tu bsdoms par rtse gdong khri chen kun dga' bsod nams lhun grub bkra shis grags pa rgyal mtshan/ sa skya sgar chen mthu stobs dbang phyug /sa skya khri chen ngag dbang kun dga' bsod nams bkra shis grags pa rgyal mtshan dpal bzang po/ de sras kun dga' bsod nams dbang phyug /lcam rje btsun ma/ zhwa dmar mchog gi sprul sku/ ra lung zhabs drung mi pham bstan pa'i nyi ma/ sger pa'i rin po che nyi ma ba/ sngags 'chang tshe ring dbang po/ chos rje 'od mchog pa/ chos sde'i zur 'chad pa kun bzang rtse pa kun dga' bkra shis/ chos rje mi pham blo gros sogs kyis mtshon pa rnams la sngags gsar rnying gi dbang rjes gnang 'khrid lung sde snod gsum gyi chos tshul mang du gsan pa dang ches nyung ba la lar bla ma'i rnal 'byor tshe dbang tshigs bcad re gsan pa yan chad la 'brom gyis se btsun dang mi las mar pa bsten pa'i rnam thar bzhin mnyes pa gsum gyi sgo nas gus pa lhur len pa las log sgrub dang bla ma'i skyon phra mo tsam yang mi 'tshol zhing thams cad yon tan du 'char ba lo chen 'brog mis gsang sngags kyi chos zab pa'i brdar bdag med ma'i dbang rdzogs re la 'bri bco lnga dang lha mo ral gcig ma'i rjes gnang re la 'bri g.yag re dgos kyi yod tshul mar pa'i rnam thar du gsal ba ltar/ bla ma dang chos kyi che ba 'don slad du sri zhu kho na mdzad cing chos gsan pa tshor yang thos lo byung lo'i ming tsam la mi 'chel bar rgya bod kyi grub mtha' so so'i bzhed tshul gyi phyag len dang bshad thabs mtha' dag yod rgyu ba dang shes rgyu ba'i zag zog sbub ldir gyi rdzong gog ye mi 'dzin par mkhyen dpyod rnam par dag pas dpyad bzod kho nar gnang ste dper na rngog lugs dang sa lugs kyi dbang gi dril bu dkrol lugs kyi mtha' brten pa spu ris phra mo tsam yang ma 'dres pa so sor dbye la/ ris med pa'i chos kyi rgyun dang gdul bya'i khams dang bsam pa tha dad pa'i dbang gis gsan pa rgya gang cher gnang ba las gtso bor thugs nyams bzhes su dgos pa dag byas so byung ngo tsam ma yin pa'i yi dam lha'i zhal mthong ba/ gsung gis gnang ba thob pa/ dam can bran du bkol ba/ rdzogs rim gyi lam la drod thob pa mdzad cing gzhan dag kyang gsan pa tsam du ma lus par so sor blo dang 'tsham par rgya cher spel ba'i zhal slob kyi grangs thams cad brjod pa lta ga la zhig bstan pa 'dzin pa'i bshes gnyen rags bsdus tsam brjod na/ dpal zha lu gser bkang gi gdan sa pa khyab bdag rin cen bsod nams mchog grub/ glang phu chos rje 'jam dpal chos skyong dbang phyug /zur thams cad mkhyen pa chos dbyings rang grol/ khra tshang pa chen po khyab bdag blo mchog rig pa'i rdo rje/ rdo rje brag nas rigs 'dzin mchog