rten gyi ljags bkod dang bcas skor cig stan chags/ ngor pa'i khams pa bsnyen chen nyer gcig song zer ba gnam rab bsam gtan sgrub sde pa dge slong shes rab dpal bzang mjal bar 'ongs pa khyod kyi ga'u'i nang du ci yod kyi dri ba gnang bar/ byin rlabs min pa gzhan med zhus pas/ spyan cher gzigs nas de min pa zhig yod pas ga'u ston dang gsung nas kha phye bas kho rang lag nag pa'i dgra la las sbyor byed bsams pa'i dug khrag gi rdzas thum yod pa bton nas mer bsregs pa gnang ba dge slong gi bsam par ngan sems de mkhyen song snyam pa'i blo 'jigs zhum pa byung skad/ mar lam rgyal grub gling 'og gi 'obs rags bsam grub sgang pa'i bu mo 'jig rten pha rol tu 'gro bar nye bar byin rlabs gnang bas nad gdon las grol te gzhi med gyur ba'i ming shi lhogs su 'dogs par mdzad do/ /bdag rgyud tha rangs zhing sar blo sbyong dang / /dmar 'khrid gdams pa'i myu gu ci yang bskyed/ /nges gsang byin rlabs rjes gnang bklag lung gi /bka' drin byang chen de srid 'khor nus min/ /zas gtsang sras kyi rnam gsum 'khor lo'i bka'/ /rgyal blon lo paN mthu las 'gyur ro cog /bskrun la bya dka' kun bzod khur mthong tshe/ /mi sngon rus sbal gzugs sprul gtam du zad/ /thub gsung las rnyed khri phrag brgal ba'i sku/ /byang chub mchod rten bcu phrag gzungs bzhugs can/ /sman ljongs yar klungs skye rgu'i legs byas su/ /grub 'di tshangs pa min pa byed po su/ /lus med thul dang de sras slob mar bcas/ /dag zhing rgya mtsho'i gnas kyi ye shes sems/ /spyan drangs mchod bstod me tog char dbab par/ /lhun pos nyi zla'i sgron me bteg nas lta/ /bzo rig gtsug lag yangs por sbyangs pa'i mig /dri med gsal ba'i dpyod ldan der tshogs kun/ /gtong ba'i phyag ring brkyang tshe ngal gsos bu'i/ /bang mdzod phye zhes legs bris mdun sar sgrog /bkra shis rgyal mtshan 'chang ba byang gling pa'i/ /yang srid rin chen bsod nams mchog grub sogs/ /snod ldan du ma'i sgra 'dzin dbang po ru/ /tshad ma bzhi ldan snyan brgyud pi waM brdungs/ /tshul 'di'i ched du dgongs rtse nyer gtod pa/ /ma 'ongs brtse chen bla ma'i khyad par gyi/ /zab don bka' babs chu bo mi nub pa'i/ /dri bral ye shes gzigs par da gdod khums/ /legs ldan dgra srog la rngam khus sgra dang / /lhan cig dmar chen argha chal chil 'dzag /rab smin 'bras bu khur du dud pa'i tshe/ /'dzad med bdud rtsi'i chu rgyun ci yang 'bab/ /'khon rigs 'jam dpal dpa' bo'i zhal gyi lung / /ro bda'i bu ram snyan gyi bcud du mngar/ /bsod nams rgyal mtshan rje btsun e waM pa'i/ /khrir 'byon lkog gyur gnas de mngon sum mkhyen/ /bskal brgyar tshe byin brlabs nus sa chen gyi/ /yon tan khyod kyis gzhan la dngom pa'i tshe/ /sngags 'chang che des spangs rtogs mnyam mo zhes/ /gang gi sbas pa'i rnam thar sgrog la brtson/ /mkha' 'gro'i dbang phyug ne gu'i thugs kyi bcud/ /zung 'jug gar mkhan khyung po'i chos drug lam/ /rdor 'dzin byed ba'i gtsug rgyan rgyal rtse bas/ /legs bshad mchod yon sbrengs pas zhal sgo 'dzum/ /theg pa rim dgu tshang ba'i dkyil 'khor du/ /theg tshul 'khrul pa med pa nyang rigs rjes/ /theg chen byang sems 'byongs pa gnas gsar ba/ /theg mchog bstan pa'i bdag por mnga' gsol mdzad/