kyis 'gyogs bsdor btang ba yin 'dug /zhag gsum tsam na sher rin pa thugs dam gsal 'debs kyi rten khyer nas byung 'phral bla ma dgyes mdzad rdo rje'i dkyil 'khor gyi gtso bor gyur pa la mchod 'bul gsol 'debs rgyas par byas/ sku gdung rin po cher snyan dar la smon lam tshigs bcad bris pa dkar me/ dgongs rdzogs kyi thebs su gos dar sha mar 'bru cha sogs bdog pa gya nom pa phul zhing dbus gtsang stod smad kun nas gdung 'bul gyi mchod sprin rgyas par spros/ gong dkar du gdung chog dang bkra shis chos sder chog gra'i rigs mang du btsugs/ drung chen byams pa dang mchod dpon 'jam dbyangs gnyis gdan sa gong du mngags pa'i dpal ldan sa skyar chos dung dkar po rgyang grags bus te mang 'gyed btang / bzhi thog tu bdag chen rin po cher 'bul bar rna ro'i bande gshin rje grags kyis bzhengs pa'i rje btsun rin po che'i sku brnyan gzhis ka sne'ur bzhugs pa rjes sor phyag tu phul ba des gtsos zang zing gi dngos po ring por brkyangs/ gzhan yang zha lu ngor chos 'khor yang rtse gsum gyis thog drangs dbus gtsang gi chos sde du mar mang ja bsngo rten/ yar klungs su ser tshogs sogs dag pa dang ma dag pa'i zhing gi gdul bya rjes 'dzin gyi dgongs pa yongs su rdzogs pa'i rim pa khu lung nas sde pa nam mkha' don grub dbang po yab sras lcam sring zhal 'bring pa rnams kyis legs par bsgrubs/ dgung zhag zhe dgu'i bar lho nub mtshams nas nyin re bzhin 'ja' dkar ku sha bkram pa ltar byung nas sku gdung rin po che'i thad kyi nam mkhar gdugs phub pa bzhin gyur pa la kun ya mtshan du 'dzin/ de skabs gtsang phyogs su bde gzar gyis lam ha cang bde ba med kyang 'di ga nas phebs dgos pa'i hung rgya lam yig dang bcas zha lu nas mkhan chen rdo rje 'dzin pa chen po phebs te hor zla bcu gcig pa'i tshes gnyis dgung zhag rdzogs pa dang bstun bla ma na rim gyi thugs dam rnal 'byor dbang phyug birWa pa'i bzhed gzhung gshed dmar lha lnga'i dkyil 'khor gyi gtso bo bla ma 'jam pa'i rdo rje sbyin sreg gi mchod pas mnyes par mdzad pa'i tshe ched du rtsol ba la ma ltos pa'i gdung yid bzhin nor bur ye shes kyi me rang 'bar lta bur gyur/ de'i sang me tog gi char 'dra ba nyi ma'i 'og nas 'od skya sim sim gdung khang dang nye bar mang du babs pa dmangs la cher mi yong ba'i rtags ya mtshan pa byung / pur khang zhal phye nas gdung skal bgo ba'i dus ring bsrel shel ltar 'tsher ba kha yar phebs/ khyab bdag zha lu pa chen po thugs brel chod de 'dir byon dus ltas ya mtshan pa byung tshul tsam las bde gzar sogs kyi g.yeng ba dang rje nyid kyang yar thegs par ring khyad 'dug gshis zhag mang du sbrel ba'i 'di dus zhib cha ma 'tshal/ dngul gdung thebs kyi gser dngul g.yu shel gyis mtshon pa'i mthun rkyen gyi bdog pa gya nom pa bstab cing bka' 'gyur dang dgongs rdzogs la song ba'i lhag ma rnams dang bcas gzhis byes rnams kyis khur blangs te bkra shis rtse chos sder hor zla gsum pa'i tshes bcu nas brtsams pa'i sku rten sman 'dam las grub pa'i mthong grol yid bzhin nor bu sku tshad dang mnyam pa/ gsung rten glegs bam yum rgyas pa dum pa bcu drug mchod dpon 'jam dbyangs kyis thig rtsa bgyis pa'i thugs rten gser dngul las