[A:548]cha shas rdzogs par mi spobs kyang / /khyod zhal dran tshe yid la dbang ma mchis/ /de phyir dam pa'i rtogs brjod cha shas kyang / /brjod pa'i dge tshogs bla na med do zhes/ /rgyal rnams bden pa'i dbyangs kyis yid drangs nas/ /gsang chen snying po'i gtam 'di phyogs brgyar bsgrags/ /dam pa'i rnam thar zla shel thig ler baiDUr tshon ris 'khyil/ /rmad byung gtam gyi bdud rtsi'i 'od dkar snyan tshig legs bshad cha yi gter/ /rtogs brjod kunda'i rtse la gar byed dpyod ldan mgrin sngon gtsug phud rgyan/ /deng 'dir skal bzang blo mun sel la e ma ho shar gyi thig le mtshar/ /a ho 'di na gsang ba mi zad pa'i/ /snyan tshig snying gi gdung sel malli kaH /ngo mtshar rtogs brjod li shi'i ljon pa dag /skal bzang gzhon nu'i grib bsil 'di ngo mtshar/ /rigs brgya'i cod pan rdo rje 'chang dbang des/ /gsang chen ye shes gzigs pa'i rmad byung gtam/ /bdag lta'i blo chung za zis sems myos nas/ /thun mong gtam du sgrog la gnang ba stsol/ /skye zhing skye ba dag ni thams cad du/ /gang gi mtshan yang bgrang bas bskal pa'i bar/ /rnyed par dka' ba'i rje btsun chos kyi rje/ /mkhyen brtse'i dbang phyug zhabs pad bsten par shog /mkhyen brtse'i dpal mnga' dbang phyug brgyad dang ldan/ /bstan pa'i rgyal mtshan 'dzin pa'i dpal yon can/ /'dren mchog bzang po pha rgod bla ma rjes/ /skye ba kun tu thugs rjes 'dzin par shog /dkyil 'khor rgya