[A:503]sa skya paNDi tas/ /mchod bstod 'dud pa'i bdag nyid can/ /shis pa brjod sogs mi 'gal te/ /thams cad du yang ston pa yi/ /che ba 'ba' zhig ston phyir ro/ /zhes pa'i don ltar tshigs bcad dpyid kyi rgyal mo'i glu dbyangs sngon du 'gro ba'i sgo nas gleng bar bya ba ni/ mkhas pa'i gsung las/ gang phyir dge legs thams cad ni/ /rtag tu sbyin zhing 'phel 'gyur ba'i/ /thub bstan dpag bsam ljon shing gi /ngo mtshar gleng la su mi gus/ /zhes bdag cag gi rnam 'dren dam pa rigs dang dkyil 'khor kun gyi khyab bdag mgon po bsod nams mchog ldan bstan pa'i rgyal mtshan dpal bzang po 'di nyid/ byon dang 'byon 'gyur 'byon bzhin pa'i sras bcas rgyal ba mtha' dag gi sku gsung thugs yon tan 'phrin las thams cad kyi ngo bo/ de dag gi mgur gyi bum pa nas dam pa'i chos kyi phung po zad mi shes pa ljags kyi dbang po legs par bkram ste gdul bya rnams kyi rna bar 'jebs pa'i sgra bo che yongs kyi snying por gyur pa nang rig pa sde snod gsum dang rgyud sde bzhi'i 'byung gnas de rnams klog pa thos bsam dang spong ba bsam gtan gyi sgo nas tshul bzhin 'dzin pa'i theg gsum skyes 'phags 'dus pa'i dbang phyug /ris su ma chad pa'i grub pa'i mtha' rgya mtsho chen po'i pha rol tu son pas mkhas pa/ nyis brgya lnga bcu rtsa gsum sogs nyes ltung gi cha phra mo tsam gyis kyang ma gos par las 'bras la zhib mor dpyod pas btsun pa/ bdag bas gzhan gces pa'i byang chub kyi sems rin po che thugs la 'khrungs pas gzhan don lhur mdzad pas bzang po/