[A:༡༠༢]འཁོར་ལོས་བཅད། །སྦྱོར་ངན་ཡུན་དུ་ཞེན་པའི་བསྙུན་གྱི་དྲི། །མ་དག་ཟུག་རྔུ་འབྱིན་པའི་མཐོ་རིས་ཆུ། །འདྲེན་པའི་རོ་ནུས་སྦྱོར་སྡེ་འཕྲུལ་པོ་ཆེ། །བྱེད་པོ་ལྷ་ཡི་སྨན་པ་ཐ་སྐར་སྐྱེས། །བློ་གྲོས་རབ་ཡངས་རྐྱེན་གྱིས་མི་གཡོ་བརྟན། །ཀུན་བཟང་མཆོད་པ་མཐའ་ཀླས་དཀྱིལ་འཁོར་ལ། །སྤྲོ་བའི་དབང་གི་རྒྱུན་ཉམས་སླར་གསོ་བ། །བསྟན་ལ་གཅིག་ཏུ་ཆེ་བའི་མཛད་པའི་ཕུལ། །མ་དང་མཁའ་འགྲོའི་ཁ་རླངས་ཀཏྤུ་རའི། །གཟེགས་མ་ཕྱོགས་བརྒྱར་འཕྲོ་བ་གསར་པའི་གཏེར། །མི་བསྲུན་འབྱུང་པོའི་ཚ་ངད་ཡོངས་བཅིལ་བ། །གན་ཇག་ཐང་ཏའི་རྣམ་པར་སྤྲུལ་ལས་བཞེས། །ཆེས་དཀོན་ཟབ་དོན་སྣོད་དུ་རིགས་སད་པར། །སྙན་བརྒྱུད་ཚད་མ་བཞི་ལྡན་གསུངས་པའི་མོད། །དཀྱིལ་འཁོར་ལྷ་ཚོགས་དགྱེས་པའི་བདེན་ཚིག་གླུ། །ལེན་ཅིང་སྲིད་མཐར་འཕེལ་བའི་ཤིས་པ་བརྗོད། །དེ་ལྟར་རྗེ་འདི་ཉིད་ཀྱིས་དམ་པའི་ཆོས་གསན་པ་དང་གར་ཐིག་དབྱངས་སྐར་རྩིས་སོགས་གནས་ཀྱི་སློབ་དཔོན་རགས་རིམ་གོང་དུ་གསལ་བ་བཞིན་དང༌། གཞན་ཡང་རྩེ་གདོང་ཁྲི་ཆེན་ཀུན་དགའ་བསོད་ནམས་ལྷུན་གྲུབ་བཀྲ་ཤིས་གྲགས་པ་རྒྱལ་མཚན། ས་སྐྱ་སྒར་ཆེན་མཐུ་སྟོབས་དབང་ཕྱུག །འབྲུག་པ་ཞབས་དྲུང་བསྟན་པའི་ཉི་མ། འབྲུག་པ་སྤྲུལ་སྐུ་རིན་པོ་ཆེ་བློ་བཟང་མི་ཕམ་དབང་ཕྱུག །ངམ་རིང་མཁན་ཆེན་ཀླུ་སྒྲུབ་ཆོས་ཀྱི་རྒྱལ་མཚན། ཞ་ལུ་མཁན་པོ་ནམ་མཁའ་ཆོས་ལྡན། ཆོས་ལུང་མཁན་ཆེན་ཐུག་པོ་བ་ལུང་རིགས་ཀུན་དགའ་རྒྱ་མཚོ། བཟང་ལྡན་མཁན་པོ་རྒྱལ་རྩེ་བ་ཀུན་དགའ་བསོད་ནམས་གྲགས་པ། བསམ་སྡིངས་སྤྲུལ་སྐུ་བདེ་ཆེན་འཚོ་མོ། ལྕོག་གྲ་སྤྲུལ་སྐུ་ངག་དབང་སྙན་གྲགས་བཟང་པོ།