[A:༡༠༡]ལམ། །རྡོ་རྗེ་ཐེག་པའི་སྙིང་པོ་ཡིན། །ཞེས་བདག་མེད་རྡོ་རྗེ་བཙུན་མོས་མཁས་གྲུབ་ཀྱི་གཙུག་རྒྱན་དཔལ་ལྡན་ཆོས་སྐྱོང་ལ་གནང་བ་ནས་བཟུང་ཟབ་ཆོས་དབང་གི་ཆུ་བོ་མ་ནུབ་ཅིང་སྙན་བརྒྱུད་མཁའ་འགྲོའི་ཁ་རླངས་གདུང་བརྒྱུད་རིམ་བར་ཚིག་བརྒྱུད་དུ་བྱོན་པ་གསུང་ངག་རིན་པོ་ཆེ་སློབ་བཤད་ཀྱི་དབང་འཁྲིད་ལུང་བྱིན་རླབས་རྣམས་གེགས་མེད་དུ་ཤིན་ཏུ་སྨིན་པར་སྩལ་བའི་རྒྱུན་ནུབ་པ་མེད་པའི་རྟེན་འབྲེལ་གྱི་སྒོ་ཕུན་སུམ་ཚོགས་པ་ནི་དཔལ་མགོན་སྟོབས་འཕྲོག་དབང་པོ་དང་ལས་མགོན་པུ་ཏྲ་ཆེན་པོ་གཉིས་ཀྱིས་འཕྲིན་ལས་བསྒྲུབས་པར་གོར་མ་ཆག །ཆོས་ཞུ་བ་རྣམས་ཀྱིས་སྒྲོལ་དཀར་གྱི་ཚེ་ཆོག་འཆི་སླུ་དང་འབྲེལ་བའི་བརྟན་བཞུགས་ཕུལ་ཞིང་དཔོན་སློབ་སོ་སོ་ནས་ཆོས་སྐྱོང་རྣམས་ལ་གཏང་རག་དང་ཚོགས་མཆོད་རྒྱས་པར་མཛད་དོ། །རྩེ་ཆེན་བླ་མའི་སྙན་བརྒྱུད་བདུད་རྩི་སོགས། །སྨིན་གྲོལ་ལུང་གི་བགྲངས་ཡས་སྒོ་ཕྱེ་ཚེ། །ཁྱབ་བདག་རྡོ་རྗེ་སེམས་དངོས་ཞ་ལུ་པར། །ངེས་རྙེད་གཞན་དུ་འཚོལ་བའི་སྤྲོས་པ་བཅད། །འཁོན་སྟོན་འཇམ་དཔལ་རྡོ་རྗེ་ཡབ་སྲས་ནས། །རིགས་ཀྱི་བདག་པོར་བཀུར་བའི་ཆེ་ཚུགས་གཞུ། །དམན་འགྲོར་རྗེས་བརྩེའི་རྒྱུད་ཀྱིས་རབ་བཀུག་པའི། །ལྷག་བསམ་མར་མེ་མཛད་དཔལ་ཚུལ་ལ་འགྲན། །མདོ་རྒྱུད་གདམས་པའི་ཚོང་ཟོང་རིན་ཅེན་དཔྱ། །རིས་མེད་གཞན་ལ་གཏོང་དང་རང་ཉིད་ཀྱིས། །བླངས་ནས་ལུང་རྟོགས་ནོར་བུའི་བློ་གྲོས་མཛོད། །ཡོངས་སུ་གང་བྱེད་དེད་དཔོན་གཞན་ན་ཅི། །ཐུབ་བསྟན་སྲོག་ཟུངས་འཛིན་ཁྱོད་ཟིལ་མངར་བཅུད། །ཕྲོག་བདུད་སྔ་ཕྱིར་ལངས་པའི་སྒྲ་གཅན་མགྲིན། །མཆོག་གསུམ་ཐུགས་རྗེ་བསྐུལ་དང་དྲང་སྲོང་གི །དམོད་དཔལ་རྡོ་རྗེ་སྲིན་པོའི་