[A:༡༢]ཀྱང་བཀའ་ལས་ཆུང་ངུའི་དུས་ནས་བཙུན་པ་མ་བྱས་པར་གཉིད་དུ་སོང་འཕྲལ་རྨི་ལམ་ལྟ་བུའི་འཁྲུལ་སྣང་ཟ་ཟི་ལ་སེར་བ་དྲག་པོ་འབབ་པའི་རྐང་ཤར་ཤར་གྱི་ཁྲོད་ནས་འབག་གྱོན་པ་སོགས་འཇིགས་གཟུགས་མང་པོས་མཐའ་བསྐོར་ནས་མི་ཚུགས་པ་ལྟ་བུ་ཡོང་བ་ཞིག་རྒྱུན་དུ་བྱུང་ལགས་ཤིང༌། དེང་སང་ཡང་དོག་ཆ་ཆེ་སྐབས་ཕྲན་བུ་ཡོང་གི་འདུག་ལགས། དེང་སང་གི་བར་དུ་བྱ་བ་ཆེ་ཆུང་ཅི་བྱེད་ཀྱང་བགེགས་བར་ཆད་རེ་ངེས་པར་ཡོང་གི་འདུག་གསུང་པ་ལ་དཔགས་ན་མཁན་ཆེན་གནས་དྲུག་པ། སྣར་ཐང་མཁན་པོ། འཇམ་དབྱངས་དཀར་པོ་གསུམ་ལ་བསམ་ཡས་ཀྱི་གནས་སྲུང་ཆེན་པོའི་བར་ཆད་བྱུང་བའི་གཞན་གཉིས་གཤེགས། འཇམ་དཀར་གྱིས་ཐུགས་སྲས་རིན་པོ་ཆེར་གྲ་ལྔའི་དབང་ཞུས་པས་བགེགས་ལས་གྲོལ་ནའང༌། དེས་རིན་པོ་ཆེ་གདན་ས་བར་གནོད་ཚུལ་ཀུན་མཁྱེན་བུས་གསུངས་པ་བཞིན། ཐུགས་སྲས་རིན་པོ་ཆེ་དང་འཇམ་དཀར་བ་སུ་རིགས་ཀྱི་བག་ཆགས་སད་པའི་ལྷ་འདྲེའི་སྙོགས་མ་བྱུང་བའི་ངེས་པ་མེད་དམ་སྙམ་པའི་ཀུན་རྟོག་གི་རི་མོར་ཤར་མོད་ཁ་དམར་ནི་གདགས་པར་ག་ལ་ནུས། ལོ་ནང་དེར་རྗེ་རྡོ་རྗེ་འཆང་གིས་རྗེས་གནང་བྱིན་རླབས་སོགས་གསུང་ཆོས་ཡང་ཡང་གནང༌། གཅེན་ཆུང་ངུ་ནས་གྲོངས་པའི་སྲི་བྱུང་དོགས་ཀྱི་ལོ་གཅིག་གི་བར་གསོ་བ་རིག་པའི་གཞུང་ནས་བཤད་པ་ལྟར་ཟླ་རེ་བཞིན་མཚན་རིམ་གྱིས་སྤོས་པའི་རྟིང་མ་དོན་གྲུབ་བསོད་ནམས་དབང་གི་རྒྱལ་པོར་གསོལ། དགུང་ལོ་གཉིས་ཙམ་གྱི་དུས་རྡོ་རྗེ་འཆང་དབང་ཕྱུག་རབ་བརྟན་མཇལ་བར་ཕེབས་པ་ན་སྐུ་རྒྱབ་ཀྱི་ཐད་ཀའི་ལྷ་མགྲོན་རྣམས་ལ་ཕྱག་བཛུབ་བལྟད་