[A:༡༣]ནས་གང་ཡིན་ཞེས་དྲི་བ་གནང་བར་བླ་མ་དང་ལྷའི་རིགས་འཁྲུལ་མེད་དུ་ངོས་འཛིན་མཛད་པས་འདི་འདྲ་ངོ་ཤེས་པ་དགོད་བྲོ་ཡ་མཚན་ཆེ་ཞེས་དགྱེས་པའི་རྣམ་འགྱུར་ཅི་ཡང་མཛད། དགུང་ལོ་བཞི་ལྔ་ཙམ་གྱི་དུས་རྩེས་པོ་ཁ་སྦུབ་པ་ཁྲིའུ་ཤིང་གི་ལུགས་སུ་བྱས་པའི་སྟེང་དུ་བྱམས་བཞུགས་མཛད་མཆོད་གནས་ཀྱི་གྲ་བ་འདྲས་ས་ཆོག་ལ་དབྱངས་འཐེན་པ་དང་མཉམ་དུ་ཁྲོ་སྤྲོ་མཛད་པའི་སྟང་ཀ་དང༌། རེས་གདན་སྣ་ཚོགས་བརྩེགས་པ་བཞུགས་ཁྲིའི་ཚུལ་དུ་མཛད་རྫ་བརྡུངས་པའི་ཕྱེ་མ་དང་རྩམ་པ་བསྲེས་ནས་དཀྱིལ་འཁོར་གྱི་དབྱིབས་བྲིས་ཏེ་སྒྲུབ་མཆོད་ཚུགས་པའི་རྣམ་པ་དང་ཡུམ་སྦྱིན་བདག་ཡིན་རྒྱུའི་ལུགས་ཀྱི་དཔོན་ས་རིན་པོ་ཆེ་དེང་སང་སྐུ་ཁམས་བཟང་པོ་བྱུང་ངམ་གསུང་བ་སོགས་ནི་འཇམ་དབྱངས་བྱང་གླིང་རྗེའི་སྔོན་གྱི་བག་ཆགས་བཟང་པོའི་མཐུ་བརྟས་པར་གདོན་མི་ཟ་ཞིང༌། རྗེ་རྡོ་རྗེ་འཆང་འཁྲུལ་ཞིག་ཚུལ་ཁྲིམས་རྒྱལ་མཚན་དུ་འཁྲུངས་པའི་དུས་འཁོར་དུ་ཡོད་ཅེས་གསུང་པ་ལ་དཔགས་ནའང་ཐམས་ཅད་མཁྱེན་པ་བུ་སྟོན་རིན་པོ་ཆེའི་རིང་ལུགས་སྤེལ་བའི་དམ་པ་འགའ་ཞིག་གི་རྣམ་པར་སྤྲུལ་པར་ལུང་རིགས་ཀྱིས་བསྒྲུབ་ནུས་སམ་སྙམ། དགུང་ལོ་བརྒྱད་བཞེས་པ་ས་མོ་བྱའི་ལོ་གཙང་སྡེ་སྲིད་ནས་ཡབ་དབོན་ཚང་སངས་རྒྱས་གྲགས་པ་རོང་བྱམས་ཆེན་གྱི་གཉེར་པར་བསྐོས་པས་ཡབ་སྲས་ལྷན་ཅིག་ཏུ་ཕེབས། སྔར་གྱི་རྒྱུན་བཞིན་གསོ་རིག་གི་ཕྱག་དཔེ་འཛིན་པ་སོགས་སྦྱོང་དར་གྱི་དབུ་བཙུགས་ཀྱང་རྗེ་ཉིད་དམ་པའི་ཆོས་ཁོ་ན་མཛད་པའི་ཐུགས་བཞེད་ཀྱིས་སྐུ་ལུས་བསྒྱུར། ཐུན་མོང་ཞེས་པ་ལྕགས་ཕོ་ཁྱིའི་ལོ་དགའ་ལྡན་གྱི་གནས་ནས་མ་ཕམ་མགོན་པོ་ཞིང་འདིར་གནས་ལྔ་རིག་པའི་པཎྜི་ཏའི་ཚུལ་