[A:༡༤]བཟུང་བ་ཐམས་ཅད་མཁྱེན་པ་བུ་སྟོན་རིན་པོ་ཆེའི་བསྟི་གནས་རི་ཕུག་ཆོས་ཀྱི་ཕོ་བྲང་དུ་དུས་གསུམ་རྒྱལ་བའི་སྤྱི་གཟུགས་རྗེ་བཙུན་དབང་ཕྱུག་རབ་བརྟན་གྱི་ཞབས་དྲུང་དུ་ཕེབས་ནས་གཙུག་ཕུད་ཕུལ་བའི་མཚན་བསོད་ནམས་དབང་པོར་གསོལ། སླར་ཡབ་ཀྱི་ཁྱད་ནས་བྱམས་ཆེན་དུ་བྱོན་འདི་ལོ་རྗེ་རྡོ་རྗེ་འཆང་ཡར་ཀླུངས་བཀྲ་ཤིས་རྩེ་ཆོས་སྡེར་རྗེ་རེས་ཆིབས་ཁ་བསྐྱོད་པའི་ཞམ་རིང་དུ་ཁྱབ་བདག་བཀའ་འགྱུར་བ་བྱོན་པ་རོང་དགའ་ལྡན་བྱམས་པ་གླིང་དུ་ཐོག་མའི་མཇལ་འཛོམ་མཛད། ཚར་ཆེན་ཆོས་ཀྱི་རྒྱལ་པོའི་ཐུགས་སྲས་རིགས་བརྒྱའི་བདག་པོ་བོད་མཁར་བ་མཻ་ཏྲི་དོན་གྲུབ་རྒྱལ་མཚན་གྱི་གདམས་པའི་མཛོད་འཛིན་སྤྱན་སྔ་རིན་པོ་ཆེ་ཆོས་ཀྱི་རྒྱ་མཚོའི་ཞལ་སློབ་ཀྱི་གཙོ་བོ་སྐྱེད་ཚལ་གོང་གི་མཁན་པོ་འབུམ་རབ་འབྱམས་པ་ཐར་པ་རྒྱལ་མཚན་གདན་དྲངས་ནས་དབང་རྗེས་གནང་རིགས་མི་གཅིག་པ་བཅོ་བརྒྱད་ཙམ་གསན་པའི་དང་པོར་གྲུབ་ཐོབ་ཀྱི་འཁོར་ལོས་སྒྱུར་བ་རྣལ་འབྱོར་དབང་ཕྱུག་བི་རཱུ་པའི་བཞེད་སྲོལ་དཔལ་ཀྱེ་རྡོ་རྗེའི་མན་ངག་ལུགས་རས་བྲིས་ཀྱི་དཀྱིལ་འཁོར་དུ་རྒྱུ་དུས་ཀྱི་དབང་གིས་སྨིན་པར་མཛད་པ་སྐུ་ཚེ་འདི་ལ་ཐུགས་ཀྱིས་དྲན་པའི་དབང་གི་ཐོག་མ་ཡིན་གསུང་བ་བུ་ལུགས་ལ་དུས་འཁོར་གསང་འདུས་རྡོར་དབྱིངས་སོགས་གཙོ་བོར་མཛད་ནའང་ཐོག་མའི་འཇུག་སྒོ་སྤྱིར་རྗེ་བཙུན་གོང་མའི་བཞེད་པ་དང༌། ཡང་སྒོས་ཁའུ་བྲག་རྫོང་པ་ནས་བརྒྱུད་པའི་གཉིས་མེད་དགྱེས་མཛད་རྡོ་རྗེའི་དབང་ཐོག་མར་གསན་པ་བདག་ཆེན་རྡོ་རྗེ་འཆང་གི་བསྟན་པ་ལ་མཆོག་ཏུ་བྱ་བ་མཛད་པའི་རྟེན་འབྲེལ་གྱི་སྒོ་འགྲིག་པར་མངོན། མཁན་རིན་པོ་ཆེས་ངེད་དེང་སང་སྐྱེད་ཚལ་གྱི་མཁན་པོ་བཞག་ནས་རོང་དཀར་ཆོས་སུ་