[A:༡༧]ཀུན་མཁྱེན་བུ་སྟོན་རིན་པོ་ཆེའི་བུམ་ཆུ་ནས་གནང༌། མཚན་རིན་ཆེན་བསོད་ནམས་མཆོག་གྲུབ་ཏུ་གསོལ། སང་ཆིབས་ཁ་སྒྱུར་བ་གནང་རྒྱུའི་དགོངས། ཕྱག་མདུད། བདུད་རྩི་རིལ་བུ། བུམ་ཆུ་ཆེན་མོ་ནས་ཆུ་བུམ་ཆུང་གང༌། ཟང་ཟིང་གི་བདོག་པའི་ཚན་གྲངས། ཨོཾ་སྭ་སྟི། འཇམ་དབྱངས་ངོ་བོ་བླ་མའི་མཆོག །བསོད་ནམས་ཡེ་ཤེས་མཐར་ཕྱིན་པའི། །ཆོས་ཀྱི་དབང་པོ་དམ་པ་ལ། །གསོལ་བ་འདེབས་སོ་བྱིན་གྱིས་རློབས། །སརྦ་མངྒ་ལཾ་ཞེས་པ་ཕྱག་བྲིས་སུ་མཛད་དེ་སྩལ་ནས་འདི་ངག་ཏུ་འདོན་པ་དང༌། ང་བྱ་འགྱུར་དུ་གསུང་ངག་འཆད་པས་དེ་དུས་སླེབས་པ་གྱིས། ཁྱེད་ལ་ས་པཎ་གྱི་སྡོམ་རྒྱུན་ཞིག་དགོས་པ་འདུག་པས་ལོ་ཉི་ཤུ་ལོན་ནས་ངའི་རྩར་ཤོག །གནས་གསར་རྗེ་དྲུང་དབུས་ནས་བྱོན་བྱུང་ན་ཆོས་ཞུས་གསུང་བ་སོགས་ཐུགས་རྩར་བཅར་བའི་བསླབ་སྟོན་མང་དུ་ཕེབས་འདུག་པ། བུ་སྟོན་རིན་པོ་ཆེའི་བུམ་ཆུ་ནི་རྗེ་འདི་ཉིད་ཀྱིས་ས་ཞལ་གྱི་དབང་གི་རྒྱུན་ཐམས་ཅད་དངོས་དང་བརྒྱུད་པའི་སྒོ་ནས་རྒྱ་ཆེར་སྤེལ་ཏེ་བསྟན་པའི་སྲོག་འཐུད་པ་དང༌། འཇམ་དབྱངས་ས་སྐྱ་པཎ་ཆེན་གྱི་སྡོམ་རྒྱུན་བཞེས་དགོས་སོགས་མ་འོངས་མངོན་སུམ་དུ་མཁྱེན་པའི་ལུང་བསྟན་དུ་འདུག་པ་བདག་ཆེན་འདི་ཉིད་སློབ་དཔོན་ཆེན་པོ་པདྨའི་རྣམ་སྤྲུལ་དུ་གྲགས་པ་དོན་ལ་གནས་པའི་དཔོན་སློབ་གཉིས་ཀའི་ཆེ་བར་མངོན་ནོ། །ལྕགས་སྟོད་དུ་ཕེབས་ནས་བདག་ཅག་གི་སྟོན་པའི་གསེར་སྐུའི་རྟེན་དང་བཅས་པའི་བཀའ་ཤོག་བསླབ་སྟོན་ཞིབ་འཁོད་གནང་ཞིང༌། རྟིང་སོར་ཞབས་དྲུང་ཁྲི་ཆེན་གཞིས་ག་རྩེར་ཕེབས་དུས་མཇལ་བ་གནང་སྐབས་སྔར་ལུགས་ལྟར་ཐུགས་རྗེས་འཛིན་པའི་དགྱེས་ཉམས་ཅི་ཡང་གནང་ཞིང་