[A:༡༨]འབྲས་སིལ་ཡུ་ཐུང་གང་གི་གསོལ་རས་མཛད་ནས་འདི་སུ་ལའང་མ་སྟེར་བར་བཙུན་ཆུང་རང་ཟོ་གསུང་བ་ལྟར་ཆོས་རྗེ་ཀུན་བཀྲས་པས་ཕྱག་མཛོད་ཀྱི་སྦུག་ཏུ་ཟར་བཅུག་ནས་ལྷག་མ་ལུས་པ་བཞེས་པ་ཡང་རྗེ་བཙུན་གོང་མའི་སྙན་བརྒྱུད་ཀྱི་གདམས་པས་ཐུགས་ཀྱི་བུམ་བཟང་བལྟམས་པའི་རྟེན་འབྲེལ་ཡིན་ནམ་སྙམ་མོ། །སྔོན་གོམས་མ་འདྲིས་འགྲོར་བརྩེའི་སྙིང་རྗེའི་གཟུགས། །ན་ཚོད་ཆེས་ཕྲའི་ཤེལ་ལ་ཚོན་རིས་བཞིན། །འ་ཞའི་རྗེ་བཙུན་མཐུ་སྟོབས་མེ་དཔུང་རྩེར། །གླགས་ལྟའི་སྦུར་མ་མིང་གི་ལྷག་མར་བྱས། །བཟང་པོའི་བག་ཆགས་མཐུ་བརྟས་ངོ་མཚར་གྱི། །རི་མོ་གཞོན་ནུའི་དུས་ཤར་དྲི་ཟའི་རྒྱུད། །དང་པོར་བརྡུངས་ཚེ་དམན་ཆ་བཟུང་བའི་གཟིངས། །མངོན་སུམ་གསལ་བའི་མཚོ་ནང་ཞིག་འདི་ཅི། །ཀུན་མཁྱེན་བླ་མའི་གདན་ས་རི་ཕུག་ཏུ། །ཀུན་སྤངས་ཆོས་རྗེའི་གདུང་འཚོབ་གནས་གསར་བར། །ཀུན་ནས་དང་བས་གཙུག་ཕུད་ཉེར་ཕུལ་ཚེ། །ཀུན་དགའི་བསོད་ནམས་ཞིང་གི་དབང་པོར་སོན། །པང་ནས་སྐྱེས་དང་ཉེ་རྒྱལ་ཇི་བཞིན་དུ། །མཆེད་ཟླ་རྗེ་བཙུན་དབོན་དང་ཐོག་མར་མཇལ། །ཐར་པའི་རྒྱལ་མཚན་རྩེ་མོར་སྨིན་བྱེད་ནོར། །བདེ་ལེགས་འདོད་དགུའི་གྲུ་ཆར་ཆེས་ཆེར་ཕབ། །སྡོམ་བརྩོན་རིན་ཆེན་འཕེལ་དང་ལྷ་ཆེན་རྗེ། །དཀོན་མཆོག་རྒྱལ་མཚན་ལ་སོགས་བཤེས་གཉེན་འགས། །བུ་སྟོན་ཆོས་རྗེའི་གསུང་རབ་འཆི་མེད་ཀྱི། །ཁང་བཟང་འཇུག་པའི་ཆོས་ཀྱི་ཐེམ་སྐས་བཙུགས། །འཇམ་དབྱངས་དབང་པོའི་དྲུང་དུ་རབ་བྱུང་ཚེ། །མ་འོངས་མངོན་སུམ་མཁྱེན་ནས་བརྡ་ཐབས་དང༌། །དགྱེས་ཞལ་འཛུམ་པའི་ལུང་བསྟན་ཐོག་བབས་པས། །སྐྱེངས་