[A:༢༩]བསྟན་པའི་མངའ་བདག་སྒྲུབ་ཁང་པ་དཔལ་ལྡན་དོན་གྲུབ་ཀྱིས་མཁན་པོ། །སྡེ་སྣོད་གསུམ་དང་རྒྱུད་སྡེ་བཞི་ལ་མི་འཕྲོགས་པའི་མཁྱེན་རབ་དང་ལྡན་པའི་གནས་བརྟན་འདུལ་བ་འཛིན་པ་ཆེན་པོ་བྲང་ཏི་པ་ནམ་མཁའ་སངས་རྒྱས་ཀྱིས་ལས་ཀྱི་སློབ་དཔོན། མཁས་གྲུབ་ཤར་ཆེན་ཤེས་རབ་འབྱུང་གནས་ཀྱིས་གསང་སྟོན། དད་པའི་དགེ་འདུན་གྲངས་ཚང་བའི་དབུས་སུ་བར་མ་རབ་བྱུང་ཞུ་བ་ནས་བཟུང་བསྙེན་རྫོགས་ཀྱི་དུས་སྒོ་བརྗོད་པའི་བར་འདུལ་ལུང་རྒྱ་བོད་ཀྱི་རྣམ་བཤད་རྣམས་ཀྱི་དགོངས་པ་བཞིན་གྲངས་གསུམ་དུ་གཅོད་པ་སོགས་ཕྱག་ལེན་ཤིན་ཏུ་དངོས་གཙང་བའི་སྒོ་ནས་ཁྲག་སྐྱུག་ཅེས་པ་ཤིང་ཕག་ཆུ་སྟོད་ཟླ་བའི་གཟའ་སྐར་འཕྲོད་སྦྱོར་དགེ་བའི་ཚེ་ཡོངས་སུ་རྫོགས་པ་དགེ་སློང་གི་དངོས་པོ་རྣམ་པར་དག་པ་བཞེས་ཏེ་ཉོན་མོངས་པའི་གཡུལ་ལས་རྣམ་པར་རྒྱལ་བའི་རྒྱལ་མཚན་བསྒྲེང་བ་ནི། སུམ་བརྒྱ་པར། ཉོན་མོངས་དགྲ་གཡུལ་རྒྱལ་བྱེད་ཚུལ་ཁྲིམས་ཏེ། །ངེས་པར་འབྱུང་བའི་ཚུལ་ཁྲིམས་སྡུག་བསྔལ་སྤོང༌། །དཔལ་འབྱོར་ས་དང་མེ་ཏོག་མདའ་ཅན་འཇོམས། །རྫོགས་པའི་བྱང་ཆུབ་དཔལ་སྣོད་དབང་བསྐུར་རོ། །ཞེས་པའི་དོན་ཐོག་ཏུ་བབས་ཤིང་མཁན་སློབ་ཁུངས་བཙུན་དེ་དག་འབད་པས་འཚོལ་བའང་རྡོ་རྗེ་འཆང་ཚར་ཆེན་གྱིས། །དེང་དུས་འདི་ན་ཁ་ཅིག་གཞན་དབང་གིས། །རང་ཡུལ་བླ་མ་ཚུལ་འཆལ་དག་ལ་ནོད། །གཞན་དག་བསམས་བཞིན་ཐག་རིང་སར་བགྲོད་ནས། །ཆེན་པོ་ཧོར་འདྲའི་སྤྱོད་ཚུལ་ཅན་ལ་ཞུ། །བདག་གིས་ཚེ་འདིའི་ངོ་སྲུང་རྒྱབ་ཏུ་བོར། །ཕྱི་མའི་དོན་ཆེན་འབའ་ཞིག་སྙིང་ནས་བསམས། །ཡོངས་རྫོགས་ཁ་ཆེའི་པཎ་